ടി.പി ചന്ദ്രശേഖരന് കൊലപാതക കേസ് പ്രതിയും സി.പി.എം പാനൂര് സി.പി.എം ഏരിയ കമ്മിറ്റി അംഗവുമായ പി.കെ കുഞ്ഞനന്തന്റെ മരണത്തില് ദുരൂഹത ആരോപിച്ച് മുസ്ലീം ലീഗ് നേതാവ് കെ.എം ഷാജി. കുഞ്ഞനന്തന് മരിച്ചത് ഭക്ഷ്യവിഷബാധയെ തുടര്ന്നാണ് മരിച്ചതെന്നും ടി.പി കൊലപാതക കേസിലെ നേതാക്കളിലേക്ക് എത്താന് കഴിയുന്ന ഏക കണ്ണിയായിരുന്നു ഇയാളെന്നും കെ എം ഷാജി പറഞ്ഞു.
കുഞ്ഞനന്തന് മരിച്ചതെങ്ങനെയാണ്. അത് ഭക്ഷ്യവിഷബാധയെ തുടര്ന്നാണ്. പക്ഷെ നിങ്ങള് നോക്കിയാല്, കണ്ണൂരിലെ എല്ലാ രാഷ്ടട്രീയ കൊലപാതകങ്ങളിലും കൊന്നവര് കൊല്ലപ്പെട്ടിട്ടുണ്ട്. ഫസലിനെ കൊന്ന മൂന്ന് പേര് മൃഗീയമായി കൊല്ലപ്പെട്ടതാണ്. കുറച്ചാളുകളെ കൊല്ലാന് വിടും. അവര് കൊന്ന് കഴിഞ്ഞ് വരും. കുറച്ച് കഴിഞ്ഞ് ഇവരില് നിന്ന് രഹസ്യം ചോര്ന്നേക്കുമെന്ന ഭയം വരുമ്പോള് കൊന്നവരെ കൊല്ലും,’എന്നായിരുന്നു കെ.എം ഷാജിയുടെ ആരോപണം.
ഫസല് കൊലപാതക കേസിലെ മൂന്ന് പേരെ കൊലപ്പെടുത്തിയത് സി.പി.എമ്മാണ്. ഷുക്കൂര് വധക്കേസിലെ പ്രധാനപ്പെട്ട പ്രതിയെ ആത്മഹത്യചെയ്ത നിലയില് കണ്ടെത്തുകയുമായിരുന്നു. മുസ്ലീം ലീഗ് മുന്സിപ്പല് കമ്മിറ്റി നടത്തിയ പഞ്ചദിന ജനകീയ പ്രതികരണയാത്രയുടെ സമാപന സമ്മേളനത്തില് സംസാരിക്കുകയായിരുന്നു ഷാജി.
ടി.പി ചന്ദ്രശേഖരന് കൊലപാതക കേസില് 13-ാമത്തെ പ്രതിയായിരുന്നു പി.കെ കുഞ്ഞനന്തന്. ജീവപര്യന്തം ശിക്ഷിക്കപ്പെട്ട് ജയില് ശിക്ഷ അനുഭവിച്ചു വരുന്നതിനിടെ അസുഖത്തെ തുടര്ന്ന് ആശുപത്രിയിലേക്ക് മാറ്റി. ഒരു വര്ഷത്തോളമായി കുഞ്ഞനന്തന് തിരുവനന്തപുരം മെഡിക്കല് കോളേജ് ആശുപത്രിയില് ചികിത്സയില് ആയിരുന്നു. വയറ്റിലെ അണുബാധ മൂര്ച്ഛിച്ചതിനെ തുടര്ന്ന് ഐ.സി.യുവിലേക്ക് മാറ്റിയ പി കെ കുഞ്ഞനന്തന് 2020 ജൂണില് ആണ് മരിക്കുന്നത്.