ദുബായ്: 5 കണ്ടെയ്നറുകളിലായി കടത്താൻ ശ്രമിച്ച 13 ടൺ മയക്കുമരുന്ന് ശേഖരം പിടിച്ചെടുത്ത് ദുബായ് പോലീസ്. ഡോറുകളിലും ഡെക്കറേറ്റീവ് പാനലുകളിലുമായി സൂക്ഷിച്ചിരുന്ന ലഹരിമരുന്നുകളാണ് പൊലീസ് പിടിച്ചെടുത്തത്. എഐ സാറ്റലൈറ്റ് സഹായത്താൽ ദുബായ് പൊലീസ് ജനറൽ ഹെഡ് ക്വാട്ടേഴ്സിന്റെ നേതൃത്വത്തിലായിരുന്നു ഓപ്പറേഷൻ. ഓരോ പ്രതികളെയായി കണ്ടെത്തി ട്രാക്ക് ചെയ്ത് പിന്തുടർന്നാണ് പൊലീസ് ആറ് പേരെ അറസ്റ്റ് ചെയ്തത്.
ഓപ്പറേഷൻ സ്റ്റോം എന്ന പേരിൽ നടത്തിയ ലഹരിവേട്ടയുടെ ദൃശ്യങ്ങൾ പൊലീസ് പുറത്തു വിട്ടിട്ടുണ്ട്. യുഎഇ ഉപപ്രധാനമന്ത്രിയും ആഭ്യന്തര മന്ത്രിയുമായ ലെഫ്റ്റനന്റ് ജനറൽ ഷെയ്ഖ് സെയ്ഫ് ബിൻ സായേദ് അൽ നഹ്യാൻ സേനയെ അഭിനന്ദിച്ചു. പിടിച്ചെടുത്ത ലഹരി വസ്തുക്കൾ കൂമ്പാരമായി കൂട്ടിയിട്ടിരിക്കുന്ന ദൃശ്യങ്ങളും പൊലീസ് പങ്കുവച്ചിട്ടുണ്ട്. രാജ്യത്ത് ലഹരി മരുന്ന് വിൽപ്പന നടത്തുന്നവരുടെ സംഘങ്ങൾക്കെതിരെ കർശന നടപടിയാണ് അധികൃതർ സ്വീകരിച്ചു വരുന്നത്.