മനാമ: ബഹ്റൈനിൽ നിന്നും കൊച്ചിയിലേക്ക് താത്കാലിക സർവ്വീസുകൾ പ്രഖ്യാപിച്ച് ഇൻഡിഗോ എയർലൈൻസ്. മറ്റു വിമാനക്കമ്പനികൾ ബഹ്റൈനിൽ നിന്നുള്ള സർവ്വീസുകൾ വെട്ടിക്കുറച്ച സാഹചര്യത്തിൽ ഇൻഡിഗോയുടെ താത്കാലിക സർവ്വീസ് പ്രവാസികൾക്ക് ആശ്വാസമാകും.
ജൂൺ 15ന് ആരംഭിക്കുന്ന സര്‍വീസ് സെപ്തംബര്‍ 20 വരെയുണ്ടാവും എന്നാണ് ഇൻഡിഗോ എയർലൈൻസ് അറിയിക്കുന്നത്. ദിവസവും രാത്രി 10:20ന് ബഹ്റൈൻ -കൊച്ചി റൂട്ടിലും വൈകിട്ട് 7:30ന് കൊച്ചി – ബഹ്റൈൻ റൂട്ടിലും ഒരോ സർവിസ് വീതമുണ്ടാകും. നേരത്തെ കോഴിക്കോട്ടേക്കുള്ള ഗൾഫ് എയർ സർവീസ് പൂർണമായും നിർത്തലാക്കിയിരുന്നു. ഞായർ, തിങ്കൾ, ബുധൻ, വെള്ളി ദിവസങ്ങളിലാണ് ഗൾഫ് എയർ കൊച്ചിയിലേക്ക് സർവീസുള്ളത്.
ഏപ്രിൽ ഒന്നു മുതൽ 2026 മാർച്ച് വരെ കൊച്ചിയിലേക്കും തിരിച്ച് ബഹ്റൈനിലേക്കുമുള്ള ചൊവ്വ, ബുധൻ ദിവസങ്ങളിലെ സർവിസുകൾ എയർ ഇന്ത്യയും വെട്ടിക്കുറച്ചിരുന്നു.
