അമേരിക്കന്‍ സ്വദേശിയായ മരിയ ബ്രാന്യാസ് മൊറേറ ഇനി ലോകത്തിലെ ഏറ്റവും പ്രായം കൂടിയ വനിത. 115–ാമത്തെ വയസ്സിലാണ് ഈ ഗിന്നസ് ലോക റെക്കോർഡ് മരിയയെ തേടിയെത്തിയത്. അതേസമയം 118 വയസ്സുള്ള ഫ്രെഞ്ച് കന്യാസ്ത്രീ ലുസൈൽ റാൻഡൻ ആയിരുന്നു ഇതുവരെ ഈ റെക്കോർഡ് നേട്ടത്തിന് അർഹയായിരുന്നത്. എന്നാൽ ജനുവരി 17ന് ലുസൈൽ മരണപ്പെട്ടു. അതിനുപിന്നാലെയാണ് മരിയ ഈ സ്ഥാനം സ്വന്തമാക്കിയത്.
1907 മാ‌ര്‍ച്ച് നാലിന് അമേരിക്കയിലാണ് മരിയ ജനിച്ചത്. മരിയയുടെ അച്ഛൻ ടെക്സാസിലെ പത്രപ്രവർത്തകനായിരുന്നു. 1931ന് മരിയ ജോൺ മോററ്റ് എന്ന ഡോക്ടറെ വിവാഹം ചെയ്തു. പിന്നീട് ഭർത്താവിനൊപ്പം നഴ്സായി ജോലി ചെയ്തു. 1976 ലാണ് മരിയയുടെ ഭര്‍ത്താവ് മരിച്ചത്. ഇവർക്കു മൂന്ന് കുട്ടികളാണുള്ളത്. 115 ആം വയസ്സിലും മരിയ ഇപ്പോഴും ട്വിറ്ററിൽ സജീവമാണ്.
തൊണ്ണൂറ്റി രണ്ടാമത്തെ വയസ്സിൽ താമസം ഒലോട്ടയിലെ നഴ്സിങ് ഹോമിലേക്ക് മരിയ താമസം മാറി. ഇപ്പോഴും അവിടുത്തെ അന്തേവാസികൾക്കൊപ്പമാണ് ഇവർ താമസിക്കുന്നത്. അതേസമയം ഈ പ്രായത്തിലും ഹോമിലെ ഊ‌ർജസ്വലയായ അന്തേവാസിയാണ് മരിയ എന്നാണ് ഇവിടുള്ളവർ അഭിപ്രായപ്പെടുന്നത്. എന്നും പിയാനോ വായനയ്ക്കായും ജിമ്നാസ്റ്റിക്സിനും വ്യായാമത്തിനുമെല്ലാം മരിയ സമയം കണ്ടെത്താറുണ്ട്.
അതേസമയം മദ്യപാനം, പുകവലി തുടങ്ങിയ ദുശ്ശിലങ്ങളൊന്നും മരിയയ്ക്കില്ല. എന്നാൽ 2020 മാർച്ചിൽ മരിയയ്ക്ക് കോവിഡ് ബാധിച്ചിരുന്നു. എങ്കിലും എല്ലാം അതിജീവിച്ച് പൂ‌ർണ ആരോഗ്യവതിയായി മരിയ തിരിച്ചുവന്നുവെന്ന് നഴ്സിംഗ് ഹോമിലെ അന്തേവാസികൾ പറഞ്ഞു. ഇപ്പോൾ ഗിന്നസ് റെക്കോർഡ് നേട്ടം സ്വന്തമാക്കിയതിന്റെ സന്തോഷം ആഘോഷിക്കാനുള്ള ഒരുക്കത്തിലാണ് കെയ‌ർഹോമിലുള്ളവ‌ർ.
