കൊല്ലപ്പെട്ട ഡോക്ടര് വന്ദനാ ദാസിന്റെ മാതാപിതാക്കളെ കണ്ട മന്ത്രി വീണ ജോര്ജ് കരഞ്ഞത് ഗ്ലിസറിന് ഇട്ടാണെന്ന് കോണ്ഗ്രസ് നേതാവ് തിരുവഞ്ചൂര് രാധാകൃഷ്ണന്. മന്ത്രിയുടേത് കഴുത കണ്ണീര് ആണെന്നും തിരുവഞ്ചൂര് പരിഹസിച്ചു.
ആഭ്യന്തര വകുപ്പിന്റെ വീഴ്ചയില് പ്രതിഷേധിച്ച് കോട്ടയത്ത് എസ്.പി ഓഫീസലേക്ക് നടത്തിയ കോണ്ഗ്രസ് മാര്ച്ചില് സംസാരിക്കുകയായിരുന്നു തിരുവഞ്ചൂര്.
‘ഇന്നലെ മോഹന്ദാസിന്റെയും സഹധര്മിണിയുടെയും അടുത്ത് നില്ക്കുമ്പോഴാണ് ഒരാള് ഇങ്ങനെ തൊഴുതുകൊണ്ട് പമ്മി പമ്മി മാറി നില്ക്കുകയാണ്. ഞാന് തല ഉയര്ത്തി നോക്കിയപ്പോള് വീണ ജോര്ജ് ആണ്, ഇങ്ങനെ രണ്ട് കൈയ്യും കൂട്ടി തൊഴുത് നില്ക്കുകയാണ്. അവര് ഇങ്ങനെ കയ്യെടുത്ത് കണ്ണ് തുടച്ചപ്പോള് ഗ്ലിസറിന് എടുത്ത് തന്നെയാണ് അവര് വന്നത് എന്ന് എനിക്ക് ബോധ്യപ്പെട്ടു. ആ കേസ് ദുര്ബലപ്പെടുത്തുന്നതിനുള്ള പരസ്യ പ്രസ്താവന നടത്തിയതിന് ശേഷം അച്ഛന്റെയും അമ്മയുടെയും മുമ്പില് കണ്ണീര് കാണിച്ചിട്ട് വല്ല കാര്യവുമുണ്ടോ? അതിനാണ് കഴുത കണ്ണീര് എന്ന് പച്ചമലയാളത്തില് മലയാളികള് പറയുന്നത്. ഇത് ജനങ്ങളെ കബളിപ്പിക്കാനാണ്,’ തിരുവഞ്ചൂര് പറഞ്ഞു.
ആര് മരിച്ചാലും തനിക്ക് ഭരിക്കണം എന്നതാണ് മുഖ്യമന്ത്രിയുടെ നിലപാട് എന്നും തിരുവഞ്ചൂര് കൂട്ടിച്ചേര്ത്തു. പിണറായി രാജി വെക്കണമെന്ന് താന് പറയില്ല. കാരണം എന്തൊക്കെ ചെയ്താലും അദ്ദേഹം രാജിവെക്കില്ല. മലവെള്ളപ്പാച്ചില് വന്നാല് പോലും അദ്ദേഹം രാജിവെക്കില്ല. ജനങ്ങള് എല്ലാം കണ്ടുകൊണ്ടിരിക്കുകയാണ്. തുടക്കം മുതല് പ്രതിയെ രക്ഷിക്കുന്നതിനുള്ള നടപടിയാണ് അദ്ദേഹം എടുത്തതെന്നും തിരുവഞ്ചൂര് പറഞ്ഞു.