ദുബായ്: വിസ സംബന്ധമായ ആവശ്യങ്ങള്‍ നിറവേറ്റുന്നതിനായി ദുബായിലെ ജനറല്‍ ഡയറക്ടറേറ്റ് ഓഫ് റെസിഡന്‍സി ആന്‍ഡ് ഫോറിന്‍ അഫയേഴ്സ് (ജിഡിആര്‍എഫ്എ) ആരംഭിച്ച വീഡിയോ കോള്‍ സര്‍വീസസ് ഉപഭോക്താക്കള്‍ക്ക് സേവനങ്ങള്‍ കൂടുതല്‍ സുഗമമാക്കിയെന്ന് വകുപ്പ്. വിഷ്വല്‍ കമ്മ്യൂണിക്കേഷന്‍ സര്‍വീസസ് എന്ന പേരിലുള്ള ഈ സേവനം എമിഗ്രേഷന്‍ ഓഫീസുകള്‍ സന്ദര്‍ശിക്കാത്ത തന്നെ വ്യക്തികളെ ഉദ്യോഗസ്ഥരുമായി വീഡിയോ കോളുകളിലൂടെ ബന്ധപ്പെടാന്‍ അനുവദിക്കുകയും അവരുടെ വിസ പ്രശ്നങ്ങള്‍ വേഗത്തിലും കാര്യക്ഷമമായും പരിഹരിക്കാനും സഹായിക്കുന്നു. ഇത്തരത്തില്‍ ദുബായില്‍ അപേക്ഷിച്ച സേവനങ്ങളുടെ നില അറിയുവാനും , അപേക്ഷിച്ച രേഖകളിലെ ന്യൂനതകള്‍ പരിഹരിക്കാനും വീഡിയോ കോള്‍ ഉപഭോക്താക്കളെ ഏറെ സഹായിക്കുന്നുവെന്ന് വകുപ്പ് അറിയിച്ചു.
വേഗമേറിയതും സൗകര്യപ്രദവുമായ ഇടപാടുകള്‍ സുഗമമാക്കുന്നതിലൂടെ ഉപഭോക്തൃ അനുഭവം മെച്ചപ്പെടുത്താന്‍ വീഡിയോ കോളിംഗ് സേവനത്തിന്റെ ആമുഖം ലക്ഷ്യമിടുന്നുവെന്ന് മേധാവി ലഫ്റ്റനന്റ് ജനറല്‍ മുഹമ്മദ് അഹ്‌മദ് അല്‍ മര്‍റി പറഞ്ഞു.വീഡിയോ കോള്‍ ആക്‌സസ് ചെയ്യുന്നതിന്, ആളുകള്‍ക്ക് ജിഡിആര്‍എഫ്എ വെബ്‌സൈറ്റ് സന്ദര്‍ശിച്ച് തല്‍ക്ഷണ വീഡിയോ കോള്‍ ഓപ്ഷന്‍ തിരഞ്ഞെടുക്കാവുന്നതാണ്.പേര്, ഇമെയില്‍ ഐഡി, മൊബൈല്‍ നമ്പര്‍, എമിറേറ്റ്സ് ഐഡി അല്ലെങ്കില്‍ പാസ്പോര്‍ട്ട് വിവരങ്ങള്‍ എന്നിവയുള്‍പ്പെടെയുള്ള വിവരങ്ങള്‍ നല്‍കണം.തുടര്‍ന്ന് സേവനത്തിന്റെ തരം വ്യക്തമാക്കുകയും ചെയ്തുകഴിഞ്ഞാല്‍, ഉപഭോക്താക്കള്‍ക്ക് വീഡിയോ വഴി ഇമിഗ്രേഷന്‍ ഉദ്യോഗസ്ഥരുമായി ബന്ധപ്പെടാന്‍ കഴിയുന്നതാണ്.
വീഡിയോ കോള്‍ ഇപ്പോള്‍ വകുപ്പിന്റെ ഓഫീസ് സമയത്തില്‍ മാത്രമാണ് ലഭ്യമായിട്ടുള്ളത്.ഭാവിയില്‍ 24/7 മണിക്കൂറും സേവനങ്ങള്‍ ലഭ്യമാക്കാനുള്ള പദ്ധതിയുണ്ട് .അതിനിടയില്‍ വീഡിയോ കോള്‍ സര്‍വീസസ് ലോഞ്ച് ചെയ്തതു മുതല്‍, സേവനം പ്രതീക്ഷകളെ മറികടന്ന് വലിയ വിജയം നേടി. ആദ്യ രണ്ട് മാസത്തിനുള്ളില്‍ മാത്രം, 250,000 വീഡിയോ കോള്‍ സേവനങ്ങള്‍ വിജയകരമായി പൂര്‍ത്തിയാക്കി ഉപഭോക്താക്കള്‍ക്കിടയില്‍ അതിന്റെ ഫലപ്രാപ്തിയും ജനപ്രീതിയും വകുപ്പ് പ്രകടമാക്കിയെന്ന് ലഫ്റ്റനന്റ് ജനറല്‍ വ്യക്തമാക്കി. വിഡിയോ കോള്‍ സേവനം എന്നത് വിവിധ അപേക്ഷകളുടെ മേല്‍ പരിഹാരം കാണുവാനുള്ളതാണ്. എന്നാല്‍ വിസ സംബന്ധമായ ഏത് അന്വേഷണങ്ങള്‍ക്കും 8005111 എന്ന ടോള്‍ഫ്രീ നമ്പറിലേക്ക് ബന്ധപ്പെടാവുന്നതാണ്
തത്‌സമയ കോളിംഗ് സേവനം സാങ്കേതിക മുന്നേറ്റങ്ങള്‍ സ്വീകരിക്കുന്നതിനുള്ള വകുപ്പിന്റെ പ്രതിബദ്ധത ഉയര്‍ത്തിക്കാട്ടുന്നു. ഈ നൂതനമായ പരിഹാരം അവതരിപ്പിക്കുന്നതിലൂടെ, ഇമിഗ്രേഷന്‍ ഉദ്യോഗസ്ഥരുമായി ഉപഭോക്താക്കള്‍ ഇടപഴകുന്ന രീതിയിലും കാര്യക്ഷമത, സൗകര്യം, ഉപഭോക്തൃ സംതൃപ്തി എന്നിവ വളര്‍ത്തിയെടുക്കുന്നതിലും ശ്രദ്ധേയമായ നേട്ടങ്ങള്‍ കൈവരിക്കാന്‍ കഴിയും .വിഷ്വല്‍ കമ്മ്യൂണിക്കേഷന്‍ സേവനങ്ങള്‍ വഴി, ഉപഭോക്താക്കള്‍ക്ക് ഇപ്പോള്‍ നേരിട്ട് ഹാജരാകുകയോ, ഒരുപാട് നേരം കാത്തിരിക്കുകയോ ആവശ്യമില്ലാതെ വിസ ആശങ്കകള്‍ പരിഹരിക്കാനാകുന്നതാണ് . സേവനം വിപുലീകരിക്കുകയും കൂടുതല്‍ എളുപ്പത്തില്‍ ലഭ്യമാവുകയും ചെയ്യുന്നതിനാല്‍, താമസക്കാര്‍, വിനോദസഞ്ചാരികള്‍, ബിസിനസ്സ് യാത്രക്കാര്‍ എന്നിവരുള്‍പ്പെടെ നിരവധി വ്യക്തികള്‍ക്ക് ഇത് ഏറെ പ്രയോജനപ്പെടുമെന്നാണ് പ്രതീക്ഷിക്കപ്പെടുന്നത്.
