ആലുവ: ഗള്ഫില് ആത്മഹത്യ ചെയ്ത പ്രവാസി മലയാളിയുടെ മൃതദേഹത്തെ ചൊല്ലി തര്ക്കം. കോട്ടയം ഏറ്റുമാനൂര് സ്വദേശി ജയകുമാറാണ് ഗള്ഫില് ഏഴ് ദിവസം മുന്പ് ആത്മഹത്യ ചെയ്തത്. ജയകുമാറിന്റെ മൃതദേഹം ഇന്ന് പുലര്ച്ചെയാണ് നെടുമ്പാശ്ശേരിയില് എത്തിച്ചത്. എന്നാല് മൃതദേഹം ഏറ്റെടുക്കാന് കുടുംബാംഗങ്ങളാരും എത്തിയില്ല. ജയകുമാറിന്റെ പെണ്സുഹൃത്തായ സഫിയയുടെ പേരിലാണ് മൃതദേഹം നാട്ടിലെത്തിയത്.
മൃതദേഹം ഏറ്റെടുക്കില്ലെന്ന് ബന്ധുക്കള് അറിയിച്ചതിനെ തുടര്ന്ന് മൃതദേഹം ആലുവ പൊലീസ് സ്റ്റേഷനിലേക്ക് കൊണ്ടു പോയി. പൊലീസ് നടത്തിയ ചര്ച്ചകള്ക്കൊടുവില് മൃതദേഹം പിന്നീട് ഏറ്റുമാനൂരിലേക്ക് കൊണ്ടു പോയി.
ഇയാളുടെ മരണവിവരം അറിഞ്ഞപ്പോള് തന്നെ മൃതദേഹം നാട്ടിലേക്ക് അയക്കേണ്ടെന്നും മരണസര്ട്ടിഫിക്കറ്റും മറ്റു രേഖകളും മാത്രം അയച്ചാല് മതിയെന്നുമായിരുന്നു വീട്ടുകാരുടെ നിലപാട്. എന്നാല് മൃതദേഹം അധികകാലം അവിടെ സൂക്ഷിക്കാന് സാധിക്കില്ലെന്ന് വന്നതോടെയാണ് നാട്ടിലേക്ക് അയച്ചത്. നാട്ടില് മൃതദേഹം എത്തിയ ശേഷം വിളിക്കാന് പറഞ്ഞ വീട്ടുകാരെ പക്ഷേ നെടുമ്പാശ്ശേരിയില് മൃതദേഹം എത്തിയ ശേഷം ഫോണില് കിട്ടിയില്ല.
ജയകുമാറും ഭാര്യയും തമ്മില് അകല്ച്ചയിലാണെന്നും ബന്ധം പിരിയുന്നതുമായി ബന്ധപ്പെട്ട് കേസ് നടക്കുകയാണ്. എന്നാല് നിയമപരമായി ബന്ധം പിരിയാത്തതിനാല് ഭാര്യയോ രക്തബന്ധത്തിലുള്ളവരോ തന്നെ മൃതദേഹം ഏറ്റെടുക്കണമെന്നാണ് നിയമമെന്ന് പെണ്സുഹൃത്ത് സഫിയ മാധ്യമങ്ങളോട് പറഞ്ഞു.