മുംബൈ: യുഎഇ തലസ്ഥാനമായ അബുദാബിയിലേക്ക് ഇന്ത്യയിൽ നിന്നും പ്രതിദിന സർവ്വീസുമായി ആകാശ എയർലൈൻസ്. ജൂലൈ 11 മുതലാണ് അബുദാബി – ദുബൈ സെക്ടറിൽ ആകാശ എയർലൈൻസിൻ്റെ പ്രതിദിന സർവ്വീസ് ആരംഭിക്കുക. അബുദാബി – മുംബൈ സർവ്വീസിനുള്ള ബുക്കിംഗ് ആകാശ വെബ്സൈറ്റിലും ആപ്പിലും ആരംഭിച്ചിട്ടുണ്ട്. മറ്റു ട്രാവൽ വെബ്സൈറ്റുകൾ വഴിയും ഏജൻസികൾ വഴിയും യാത്ര ബുക്ക് ചെയ്യാം.
“ഇന്ത്യയിലെ വിനോദ സഞ്ചാരികൾക്കും വ്യവസായികൾക്കും ഏറെ പ്രിയപ്പെട്ട നഗരമായി അബുദാബി മാറിക്കഴിഞ്ഞു. ഇരു രാജ്യങ്ങൾക്കുമിടയിലെ വിമാനസർവ്വീസുകൾക്കും വലിയ ഡിമാൻഡാണുള്ളത്. അബുദാബി സർക്കാരിൻ്റെ ടൂറിസം മിഷൻ 2030 കൂടി കണക്കിലെടുത്താൽ വരും വർഷങ്ങളിൽ ഇന്ത്യയും യുഎഇയും തമ്മിലുള്ള വിനോദസഞ്ചാരം കൂടുതൽ ശക്തിപ്പെടുക തന്നെ ചെയ്യും” – ആകാശ എയർ സീനിയർ വൈസ് പ്രസിഡൻ്റും സഹസ്ഥാപകനുമായ നീലു ഖത്രി പറഞ്ഞു.
2024 മാർച്ച് 28 ന് ഖത്തർ തലസ്ഥാനമായ ദോഹയിലേക്ക് പറന്നാണ് ആകാശ എയർലൈൻസ് അന്താരാഷ്ട്ര സർവ്വീസുകൾ ആരംഭിച്ചത്. തുടർന്ന് 2024 മെയ്, ജൂൺ മാസങ്ങളിൽ ജിദ്ദയിലേക്കും റിയാദിലേക്കും ആകാശ സർവ്വീസ് ആരംഭിച്ചു. ഖത്തറിനും സൗദ്ദിക്കും പിന്നാലെയാണ് ഇപ്പോൾ യുഎഇയിലേക്കും ആകാശ എയർലൈൻസ് ചുവടുവയ്ക്കുന്നത്. ജിസിസിയിലേക്ക് കൂടുതൽ സർവ്വീസുകൾ വരും മാസങ്ങളിൽ ആകാശ ആരംഭിക്കും എന്നാണ് സൂചനകൾ. കേരള – ജിസിസി സെക്ടറിൽ ശക്തമായ സാന്നിധ്യമാകാനും കമ്പനി പദ്ധതിയിടുന്നു.