ദുബായ്: ഇന്ത്യയില ഉന്നത വിദ്യാഭ്യാസ സ്ഥാപനങ്ങളായ ഐഐഎം അഹമ്മദാബാദും ഇന്ത്യൻ ഇൻസ്റ്റിറ്റ്യൂട്ട് ഓഫ് ഫോറിൻ ട്രേഡും (ഐഐഎഫ്ടി) ദുബായിൽ അവരുടെ കാമ്പസുകൾ സ്ഥാപിക്കും. ദുബായ് കിരീടാവകാശിയും യുഎഇ ഉപപ്രധാനമന്ത്രിയും പ്രതിരോധമന്ത്രിയുമായ ഷെയ്ഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തൂമിൻ്റെ ഇന്ത്യ സന്ദർശനത്തിനിടെയാണ് ഇതുമായി ബന്ധപ്പെട്ടാണ് തീരുമാനമുണ്ടായത്. ഇന്ത്യയും യുഎഇയും തമ്മിലുള്ള വിദ്യാഭ്യാസ, സാമ്പത്തിക ബന്ധങ്ങൾ ശക്തിപ്പെടുത്തുന്നതിന്റെ ഭാഗമായാണ് ഈ നീക്കം.
ഷെയ്ഖ് ഹംദാൻ ഇന്ത്യയിലെത്തിയത് ഇരുരാജ്യങ്ങളും തമ്മിലുള്ള ഉഭയകക്ഷി ബന്ധങ്ങൾ മെച്ചപ്പെടുത്തുന്നതിനും വിദ്യാഭ്യാസ മേഖലയിലെ സഹകരണം പ്രോത്സാഹിപ്പിക്കുന്നതിനുമാണ്. ഐഐഎം അഹമ്മദാബാദ്, ലോകോത്തര മാനേജ്മെന്റ് വിദ്യാഭ്യാസത്തിന് പേര് കേട്ട സ്ഥാപനമാണ്, അതേസമയം ഐഐഎഫ്ടി അന്താരാഷ്ട്ര വ്യാപാരത്തിൽ ശ്രദ്ധ കേന്ദ്രീകരിക്കുന്നു. ഈ രണ്ട് സ്ഥാപനങ്ങളും ദുബായിൽ കാമ്പസുകൾ തുറക്കുന്നത് യുഎഇയിലെ വിദ്യാർത്ഥികൾക്ക് ഉയർന്ന നിലവാരമുള്ള വിദ്യാഭ്യാസം ലഭ്യമാക്കാൻ വഴി തുറക്കും.
സന്ദർശനത്തിനിടെ, ഇന്ത്യൻ വ്യവസായ രംഗത്തെ പ്രമുഖരുമായും ഷെയ്ഖ് ഹംദാൻ ചർച്ചകൾ നടത്തുന്നുണ്ട്. ദുബായിയെ ആഗോള സാമ്പത്തിക കേന്ദ്രമാക്കി മാറ്റാനുള്ള ശ്രമങ്ങൾക്ക് ഇന്ത്യൻ വിദ്യാഭ്യാസ സ്ഥാപനങ്ങളുടെ സാന്നിധ്യം കൂടുതൽ ശക്തി പകരുമെന്നാണ് പ്രതീക്ഷിക്കപ്പെടുന്നത്. കൂടാതെ, ഇന്ത്യയും യുഎഇയും തമ്മിലുള്ള വ്യാപാര, നിക്ഷേപ ബന്ധങ്ങൾ ഈ സഹകരണത്തിലൂടെ കൂടുതൽ ഊർജ്ജം പ്രാപിക്കും. ഈ നീക്കം ഇന്ത്യൻ വിദ്യാഭ്യാസ സ്ഥാപനങ്ങൾക്ക് അന്താരാഷ്ട്ര തലത്തിൽ വ്യാപിക്കാനുള്ള അവസരവും യുഎഇയിലെ യുവാക്കൾക്ക് അവരുടെ മണ്ണിൽ തന്നെ മികച്ച പഠന സൗകര്യങ്ങൾ ലഭിക്കാനുള്ള വഴിയും തുറക്കുന്നു.
