2023ൽ അഞ്ചു മേഖലകൾക്ക് മുൻഗണന നൽകുമെന്ന് യുഎഇ വൈസ് പ്രസിഡൻ്റും പ്രധാനമന്ത്രിയും ദുബായ് ഭരണാധികാരിയുമായ ശൈഖ് മുഹമ്മദ് ബിൻ റാഷിദ് അൽ മക്തൂം പ്രഖ്യാപിച്ചു. പുതുവർഷത്തിലെ ആദ്യ കാബിനറ്റ് യോഗത്തിനു ശേഷമായിരുന്നു ട്വിറ്ററിലൂടെയുള്ള പ്രഖ്യാപനം.
ദേശീയ ഐക്യം, ഏകീകരണം, പരിസ്ഥിതിയും സുസ്ഥിരതയും, വിദ്യാഭ്യാസ സമ്പ്രദായവും കാഴ്ചപ്പാടിന്റെ പുരോഗതിയും സൂചകങ്ങളും, സ്വദേശിവത്കരണം, അതിൻ്റെ വേഗം വർധിപ്പിക്കൽ, യുഎഇയുടെ രാജ്യാന്തര സാമ്പത്തിക ബന്ധങ്ങൾ വികസിപ്പിക്കുക എന്നിവയാണ് യുഎഇ സർക്കാർ ഈ വർഷം മുൻഗണന നൽകാൻ പോകുന്ന അഞ്ചു കാര്യങ്ങൾ.
2022ൽ 71 രാജ്യാന്തര കരാറുകളിൽ യുഎഇ ഒപ്പുവച്ചിരുന്നു. ഇന്ന് രാജ്യത്തിൻ്റെ സാമ്പത്തികം, സാമൂഹികം, അടിസ്ഥാന വികസനം, ഡിജിറ്റൽ മേഖല എന്നിവ അടുത്ത ഘട്ടത്തിലേക്ക് കടക്കുകയാണെന്നും അദ്ദേഹം സൂചിപ്പിച്ചു. കഴിഞ്ഞ വർഷം രാജ്യത്ത് നടത്തിയ വിവിധ പദ്ധതികളും ശൈഖ് മുഹമ്മദ് ഓർമ്മിപ്പിച്ചു. പുതിയ വർഷത്തെ പ്രതീക്ഷയോടെയാണ് കാണുന്നതെന്നും രാജ്യത്തിനു മികച്ച ഭാവിയുണ്ടാകുമെന്നും പ്രതീക്ഷയും പങ്കുവച്ചിരിക്കുകയാണ് അദ്ദേഹം.