ഇറാൻ-യുഎഇ ബന്ധം വീണ്ടും ശക്തമാവും. ഇറാനിലെ യുഎഇ അംബാസഡർ സെയ്ഫ് മുഹമ്മദ് അൽ സാബി ടെഹ്റാനിൽ ഉടൻ ചുമതല ഏൽക്കുമെന്ന് വിദേശകാര്യ, അന്താരാഷ്ട്ര സഹകരണ മന്ത്രാലയം അറിയിച്ചു. ഇസ്ലാമിക് റിപ്പബ്ലിക് ഓഫ് ഇറാനുമായുള്ള ബന്ധം ശക്തിപ്പെടുത്തുന്നതിനുള്ള യുഎഇ ശ്രമങ്ങളുടെ ഭാഗമായാണ് തീരുമാനം.
2022 ജൂലൈ 26 ന് വിദേശകാര്യ, അന്താരാഷ്ട്ര സഹകരണ മന്ത്രി ഷെയ്ഖ് അബ്ദുല്ല ബിൻ സായിദ് അൽ നഹ്യാനും ഇസ്ലാമിക് റിപ്പബ്ലിക് ഓഫ് ഇറാന്റെ വിദേശകാര്യ മന്ത്രി ഡോ ഹുസൈൻ അമീർ അബ്ദുള്ളാഹിയാനും തമ്മിൽ ഇതുസംബന്ധിച്ച് ഫോൺ സംഭാഷണം നടത്തിയിരുന്നു.
ഉഭയകക്ഷി ബന്ധത്തെ നിയന്ത്രിക്കുന്ന നയതന്ത്ര മാനദണ്ഡങ്ങൾക്കനുസൃതമായി ഇറാന്റെ ഇസ്ലാമിക് റിപ്പബ്ലിക്കിന്റെ വിദേശകാര്യ മന്ത്രാലയത്തിന്റെ ഏകോപനത്തിലാണ് ഇത് വരുന്നതെന്ന് വിദേശകാര്യ, അന്താരാഷ്ട്ര സഹകരണ മന്ത്രാലയം അറിയിച്ചു. ഉഭയകക്ഷി ബന്ധം കൂടുതൽ ശക്തമാക്കുന്നതിനും ഇരു രാജ്യങ്ങളുടെയും പൊതു താൽപ്പര്യങ്ങൾ സംരക്ഷിക്കുന്നതിനും പുതിയ ബന്ധത്തിലൂടെ സാധ്യമാകും.
