ലോകം മുഴുവൻ ആരാധകരുള്ള ഗായികയാണ് ഷക്കീറ. ഹിറ്റ് ചാർട്ടിലിടം പിടിക്കുന്ന പാട്ടുകളും വിവാദമാകുന്ന ഷക്കീറയുടെയും സ്വകാര്യജീവിതവുമെല്ലാം കാലങ്ങളായി വാർത്തകളിൽ ഇടം പിടിക്കുന്നവയാണ്. ഇപ്പോഴിതാ ഷക്കീറയുടെ പുതിയ പാട്ടായ ‘ഔട്ട് ഓഫ് ദ് ലീഗ്’ മൂന്നു ദിവസത്തിനുള്ളിൽ തന്നെ യൂട്യൂബിൽ 100 മില്യണിലധികം കാഴ്ചക്കരെ നേടിയിരിക്കുകയാണ്.
ഇതിലൂടെ പുതിയ റെക്കോർഡ് സ്വന്തമാക്കിയിരിക്കുകയാണ് ഷക്കീറ. ‘ഔട്ട് ഓഫ് ദ് ലീഗ്’ യൂട്യൂബിൽ ഏറ്റവുമധികമാളുകൾ കണ്ട ലാറ്റിൻ ട്രാക്ക് ആയി ഇതിനോടകം മാറികഴിഞ്ഞു. അതേസമയം മുൻ കാമുകനും സ്പാനിഷ് ഫുട്ബോളറുമായ ജെറാർദ് പീക്കേയെ പരിഹസിച്ചാണ് ഷക്കീറ ‘ഔട്ട് ഓഫ് ദ് ലീഗ്’ പുറത്തിറക്കിയതെന്ന വിവാദവും ഒപ്പം കൂടിയിരിക്കുകയാണ്. എന്നാൽ 23 കാരിയായ ക്ലാരയുമായി ജെറാർദ് ഡേറ്റിങ്ങിലാണെന്ന വാർത്തകൾ പുറത്തുവന്നിരുന്നു. ഇതിനെ പരിഹസിക്കും വിധത്തിലാണ് ഷക്കീറയുടെ പാട്ടെന്നാണ് വിവാദം.
ഷക്കീറയും ജെറാർദ് പീക്കേയും 2022 ജൂണിലാണ് പ്രണയബന്ധം വേർപിരിഞ്ഞത്. വാർത്താക്കുറിപ്പിലൂടെയായിരുന്നു ഇവർ തന്നെയാണ് വേർപിരിയൽ പ്രഖ്യാപനം നടത്തിയത്. ഷക്കീറയെ പ്രശസ്തിയിലേക്കെത്തിച്ച ഫുട്ബോൾ ഗാനം ‘വക്കാ വക്കാ’യുടെ ചിത്രീകരണ വേളയിലാണ് ഇരുവരും പരിചയത്തിലാകുന്നത്. പിന്നീടത് പ്രണയമായി. 12 വർഷം നീണ്ട പ്രണയബന്ധത്തിനൊടുവിലാണ് ഇരുവരും പിരിഞ്ഞത്.