ന്യൂഡൽഹി: ശക്തമായ ആകാശച്ചുഴിയിൽപ്പെട്ടതിനെ തുടർന്ന് എയർഇന്ത്യ വിമാനത്തിലെ യാത്രക്കാർക്ക് പരിക്കേറ്റു. ഡൽഹിയിൽ നിന്നും സിഡ്നിയിലേക്ക് പോയ എയർഇന്ത്യ വിമാനമാണ് യാത്രാമധ്യേ ആകാശച്ചുഴിയിൽപ്പെട്ടത്. സംഭവത്തിൽ വിമാനത്തിലുണ്ടായിരുന്ന ചില യാത്രക്കാർക്ക് പരിക്കേറ്റതായി എയർഇന്ത്യ അറിയിച്ചു.
എന്നാൽ ആർക്കും ഗുരുതരമായ പരിക്കുകളൊന്നും റിപ്പോർട്ട് ചെയ്തിട്ടില്ലെന്നും യാത്രക്കാർക്ക് വിമാനത്തിൽ വൈദ്യസഹായം നൽകിയതായും കമ്പനി വ്യക്തമാക്കി. ആകാശച്ചുഴിയിൽ വിമാനം കുടുങ്ങിയതിന് പിന്നാലെ വിമാനത്തിലുണ്ടായിരുന്ന ഒരു ഡോക്ടറുടേയും നഴ്സിൻ്റേയും സഹായത്തോടെ പരിക്കേറ്റവരെയെല്ലാം പരിശോധിച്ചു. ആവശ്യമായവർക്കും ക്യാബിൻ ക്രൂസ് ഫസ്റ്റ് എയ്ഡ് സേവനം ലഭ്യമാക്കി.
വിമാനം സിഡ്നി വിമാനത്താവളത്തിലെത്തിയതിന് പിന്നാലെ വിമാനത്താവള അധികൃതരുടെ നേതൃത്വത്തിൽ പരിക്കേറ്റ യാത്രക്കാർക്കെല്ലാം വൈദ്യസഹായം നൽകിയെന്നും അധികൃതർ കൂട്ടിച്ചേർത്തു. മൂന്ന് യാത്രക്കാരാണ് സിഡ്നി വിമാനത്താവളത്തിൽ വൈദ്യസഹായം തേടിയത് എന്നാൽ ആശുപത്രിയിലേക്ക് മാറ്റേണ്ട തരത്തിലുള്ള പരിക്കൊന്നും ആർക്കുമില്ലായിരുന്നുവെന്നും അധികൃതർ അറിയിച്ചു.