മാത്യു കുഴല്നാടന്റെ പേരില് ചിന്നക്കനാലില് 50 സെന്റ് അധിക ഭൂമിയുണ്ടെന്ന വിജിലന്സ് കണ്ടെത്തല് ശരിവെച്ച് റവന്യു വകുപ്പ്. ഇത് സംബന്ധിച്ച് ഉടുമ്പന് ചോല റവന്യു തഹസില്ദാര് ജില്ലാ കളക്ടര്ക്ക് റിപ്പോര്ട്ട് നല്കി. മാത്യു കുഴല്നാടന്റെ ചിന്നക്കനാലിലെ റിസോര്ട്ട് പണിത ഭൂമിയില് സര്ക്കാര് ഭൂമി ഉള്പ്പെട്ടിട്ടുണ്ടെന്നാണ് റവന്യു വിഭാഗം കണ്ടെത്തിയത്.
ആധാരത്തിലുള്ളതിനേക്കാള് 50 സെന്റ് അധികം ഭൂമി മാത്യു കുഴല്നാടന് കൈവശം വെച്ചിരിക്കുകയാണെന്നും ഈ സ്ഥലം കൈയ്യേറി എംഎല്എ മതില് നിര്മിച്ചെന്നും രജിസ്ട്രേഷനിലും പോക്കുവരവിലും ക്രമക്കേട് നടത്തിയെന്നും വിജിലന്സ് പറയുന്നു.
സ്ഥലം വാങ്ങുമ്പോള് ഉണ്ടായിരുന്ന 1000 ചതുരശ്രയടി കെട്ടിടത്തിന്റെ കാര്യം മറച്ചുവെച്ച് നികുതി വെട്ടിപ്പ് നടത്തിയെന്നും വിജിലന്സ് ആരോപിക്കുന്നു. 2008ലെ മിച്ചഭൂമി കേസില് ഉള്പ്പെട്ട സ്ഥലത്താണ് മാത്യു കുഴല്നാടന്റെ റിസോര്ട്ട് സ്ഥിതി ചെയ്യുന്നത്. ഇത് വില്പ്പന നടത്താനും സാധിക്കില്ല.
മൂന്ന് ആധാരങ്ങളിലായി ഒരേക്കറും 23 സെന്റുമാണ് മാത്യു കുഴല്നാടന്റെ പേരില് ഉള്ളത്. അധികമായി കൈവശം വെച്ചിരിക്കുന്ന ഭൂമിയുടെ കാര്യത്തില് എന്ത് തീരുമാനമെടുക്കണണമെന്ന് നിര്ദേശിക്കണമെന്ന് ആവശ്യപ്പെട്ടാണ് തഹസില്ദാര് ജില്ലാ കളക്ടര്ക്ക് റിപ്പോര്ട്ട് നല്കിയിരിക്കുന്നത്.