തിരുവനന്തപുരം: മലേഷ്യൻ തലസ്ഥാനമായ ക്വാലാലംപൂരിലേക്ക് തിരുവനന്തപുരത്ത് നിന്ന് പുതിയ വിമാന സർവീസ്. മലേഷ്യൻ എയ‍ർലൈൻസാണ് തിരുവനന്തപുരത്ത് നിന്നും ക്വാലാലംപൂരിലേക്ക് പുതിയ സർവ്വീസ് പ്രഖ്യാപിച്ചത്. ബോയിംഗ് 737 – 800 വിമാനമാണ് സർവ്വീസിനായി ഉപയോഗിക്കുക.
ബിസിനസ് ക്ലാസ്സിലടക്കം ആകെ 174 സീറ്റുകളാണ് വിമാനത്തിലുണ്ടാവുക. ആദ്യഘട്ടത്തിൽ ഞായർ, വ്യാഴം ദിവസങ്ങളിലാവും സർവ്വീസ്. മലേഷ്യൻ എയർലൈൻസ് ഇതാദ്യമായാണ് തിരുവനന്തപുരത്തേക്ക് സർവ്വീസ് നടത്തുന്നത്. രാത്രി പതിനൊന്ന് മണിയോടെ എത്തി അർധരാത്രി പന്ത്രണ്ട് മണിക്ക് ശേഷം തിരിച്ചു പോകുന്ന രീതിയിലാണ് സർവ്വീസ് ക്രമീകരിച്ചിരിക്കുന്നത്.
ഓസ്ട്രേലിയ, ന്യൂസിലാൻഡ്, നോർത്ത് അമേരിക്ക, ചൈന, ഹോങ്കോങ്, വിയറ്റ്നാം ഉൾപ്പെടെയുള്ള രാജ്യങ്ങളിലേക്ക് കണക്ടിവിറ്റി സൗകര്യവും മലേഷ്യൻ എയർലൈൻസ് വാഗ്ദാനം ചെയ്യുന്നു. ഈസ്റ്റ് ഏഷ്യൻ രാജ്യങ്ങളിലേക്ക് ബിസിനസ് ക്ലാസ് യാത്രാസൗകര്യം വേണമെന്ന ആവശ്യം ഐടി കമ്പനികൾ ഉൾപ്പെടെ വളരെ കാലമായി ഉന്നയിക്കുന്നുണ്ടായിരുന്നു. ഓസ്ട്രേലിയ അടക്കമുള്ള രാജ്യങ്ങളിൽ പഠിക്കുന്ന വിദ്യാർത്ഥികൾക്കും മലേഷ്യയിൽ ജോലി ചെയ്യുന്ന തെക്കൻ തമിഴ്നാട്ടുകാർക്കും സർവീസ് പ്രയോജനപ്പെടും.
