ഇറ്റലിയിൽ പറന്നുയര്ന്ന് നിമിഷങ്ങള്ക്കകം ചരക്കുവിമാനത്തിന്റെ മെയിന് ലാന്ഡിങ് ഗിയര് ടയര് താഴേക്കുവീണു. ടറന്റോയില്നിന്ന് പറന്നുയര്ന്ന അറ്റ്ലസ് എയറിന്റെ ബോയിങ് 747 വിമാനത്തിന്റെ ലാൻഡിംഗ് ഗിയർ ടയറുകളാണ് താഴേക്ക് വീണത്. ബോയിങ് 787 ഡ്രീം ലൈനറിന്റെ ഭാഗങ്ങൾ കൊണ്ടുപോകുന്നതിനായി യു എസിലെ ചാൾസ്റ്റണിലേക്ക് പുറപ്പെട്ടപ്പോഴായിരുന്നു സംഭവം.
വിമാനം റൺവേയിൽ നിന്ന് പറന്നുയർന്നതും ലാൻഡിംഗ് ഗിയർ ടയർ താഴേക്ക് വീഴുന്ന ദൃശ്യങ്ങൾ പ്രചരിക്കുന്നുണ്ട്. ടയർ വീഴുന്നതിനോടൊപ്പം കറുത്ത പുക ഉയരുന്നതായും വിഡിയോയിൽ കാണാം. റൺവേ അവസാനിക്കുന്നിടത്ത് നിന്നും ടയർ കണ്ടെത്തിയിട്ടുണ്ട്. അതേസമയം യു എസിൽ വിമാനം സുരക്ഷിതമായി ഇറക്കിയെന്നാണ് പുറത്ത് വരുന്ന റിപ്പോർട്ടുകൾ.
2006 സെപ്റ്റംബറിലാണ് 747 ആദ്യമായി സർവീസ് ആരംഭിച്ചത്. ബോയിങ് 747-400 വിമാനത്തിന്റെ പരിഷ്കരിച്ച പതിപ്പാണ് ബോയിങ് 747 ഡ്രീം ലിഫ്റ്റർ വിമാനം. അത്യാവശ്യത്തിനു മാത്രം ക്രൂ അംഗങ്ങളെയല്ലാതെ മറ്റ് യാത്രക്കാരെ കൊണ്ടു പോവാൻ ഈ വിമാനങ്ങൾക്ക് അനുവാദമില്ല.