യു.എസില് ഭര്ത്താവിന്റെ വെടിയേറ്റ് ചികിത്സയില് കഴിയുന്ന മലയാളി യുവതിയുടെ ആരോഗ്യത്തില് നേരിയ പുരോഗതി. ഗുരുതര പരിക്കുകളോടെ ആശുപത്രിയില് പ്രവേശിപ്പിച്ച ഉഴവൂര് സ്വദേശി മീരയ്ക്ക് കഴിഞ്ഞ ദിവസം ശസ്ത്രക്രിയ നടത്തിയിരുന്നു. എന്നാല് ഗുരുതര രക്തസ്രാവത്തെ തുടര്ന്ന് ഗര്ഭസ്ഥ ശിശു മരിച്ചു. രണ്ട് മാസം ഗര്ഭിണിയായിരുന്നു മീര.
മീരയ്ക്ക് നിലവില് മൂന്ന് ശസ്ത്രക്രിയകളാണ് നടത്തിയത്. ഇലിനോയ് ലൂഥറന് ജനറല് ആശുപത്രിയിലാണ് ചികിത്സയില് കഴിയുന്നത്.
മീരയെ കുടുംബ പ്രശ്നങ്ങളെ തുടര്ന്ന് ഭര്ത്താവ് അമല് റെജി വെടിവെച്ചെന്നാണ് കേസ്. യു.എസ് സമയം തിങ്കളാഴ്ച രാത്രി 10.10ന് ഷിക്കാഗോയിലെ ഒരു പള്ളിക്ക് സമീപമാണ് സംഭവം. പത്ത് തവണ വെടിയുതിര്ത്തതായി തെളിഞ്ഞു.
മീരയുടെ തൊട്ടടുത്ത് നിന്നാണ് അമല് റെജി വെടിയുതിര്ത്തത്. മീരയുടെ കണ്ണിനും വാരിയെല്ലിനും വെടിയേറ്റിട്ടുണ്ട്. അമല് റെജിയെ പൊലീസ് അറസ്റ്റ് ചെയ്തിട്ടുണ്ട്.
മീരയുടെ സഹോദരി മീനു ഇവര് താമസിക്കുന്നതിന് അടുത്ത് തന്നെയാണ് താമസിക്കുന്നത്. മീരയും മീനുവും നഴ്സുമാരാണ്. ഒന്നരവര്ഷം മുമ്പാണ് മീരയും ഭര്ത്താവും അമേരിക്കയിലേക്ക് പോയത്. ഇവര്ക്ക് മൂന്ന് വയസുള്ള ഒരു മകന് കൂടിയുണ്ട്.