ദുബായ്: സർക്കാർ ജീവനക്കാരായ മാതാപിതാക്കൾക്ക് ജോലി സമയത്തിൽ ഇളവ് പ്രഖ്യാപിച്ചു. പുതിയ അധ്യയന വർഷം ആരംഭിക്കുന്ന ഓഗസ്റ്റ് 28 നാണ് യുഎഇ യിലെ സർക്കാർ ജീവനക്കാരായ മാതാപിതാക്കൾക്ക് 3 മണിക്കൂർ ഇളവ് അനുവദിച്ചത്. ‘ബാക് ടു സ്കൂൾ’ പദ്ധതിയുടെ ഭാഗമായി തൊഴിൽ മന്ത്രാലയത്തിന്റേതാണ് തീരുമാനം.
പുതിയ അധ്യയന വർഷത്തിന്റെ ആദ്യ ദിനം രക്ഷിതാക്കൾക്ക് വൈകി ജോലിക്കെത്താനും ജോലി കഴിഞ്ഞ് നേരത്തെ വീട്ടിലെത്താനും സാധിക്കും വിധമാണ് സമയ ക്രമീകരണം. സ്കൂൾ, നഴ്സറി, കിൻഡർ ഗാർഡൻ വിഭാഗത്തിൽ പഠിക്കുന്ന കുട്ടികളുടെ രക്ഷിതാക്കൾക്കാണ് ഈ ആനുകൂല്യം ലഭിക്കുക. ഫെഡറൽ ജീവനക്കാരുടെ തൊഴിൽ ജീവിതവും സ്വകാര്യജീവിതവും സന്തുലിതമാക്കുകയാണ് ഇത് വഴി ലക്ഷ്യമിടുന്നത്.
കുട്ടികളുടെ സ്കൂളിലെ രക്ഷകർതൃ യോഗം, ബിരുദദാന ചടങ്ങ്, തുടങ്ങി കുട്ടികളുമായി ബന്ധപ്പെട്ട പരിപാടികളിൽ പങ്കെടുക്കാനും ഈ ആനുകൂല്യം ഉപയോഗിക്കാവുന്നതാണ്. എന്നാൽ ജോലി ചെയ്യുന്ന സ്ഥാപനങ്ങളുടെ തൊഴിൽ സാഹചര്യങ്ങളെ ബാധിക്കാത്ത വിധമായിരിക്കണം ആനുകൂല്യം ഉപയോഗിക്കേണ്ടത്.
കഴിഞ്ഞ വർഷം മുതലാണ് യുഎഇ യിൽ ഈ നിയമം നടപ്പിലാക്കിയത്. വൻ സ്വീകാര്യതയാണ് പദ്ധതിക്ക് രാജ്യത്ത് ലഭിച്ചത്. ഈ വർഷം യുഎഇയിലുടനീളം പതിനായിരക്കണക്കിന് കുട്ടികളാണ് സ്കൂളുകളിൽ പോകുന്നത്.