മകളെ കൊലപ്പെടുത്തിയ പ്രതിയ്ക്ക് വധ ശിക്ഷ തന്നെ നല്കണമെന്ന് ആലുവയില് കൊലചെയ്യപ്പെട്ട അഞ്ചുവയസുകാരിയുടെ പിതാവ്. കുഞ്ഞ് ഇപ്പോള് തന്റേത് മാത്രമല്ലെന്നും കേരളത്തിന്റെ കൂടിയാണെന്നും പിതാവ് പറഞ്ഞു.
കേസില് കൂടുതല് പ്രതികള് ഉള്ളതായി സംശയിക്കുന്നതായും പിതാവ് പറഞ്ഞു. കേസില് ഇതുവരെ ഒരു പ്രതിയെ മാത്രമാണ് പിടികൂടിയത്. കൂടുതല് പ്രതികള് ഉണ്ടെങ്കില് അവരെ ഉടന് പിടികൂടണമെന്നും അദ്ദേഹം പറഞ്ഞു.
സംസ്ഥാന സര്ക്കാരിനെതിരെയോ പൊലീസിനെതിരെയോ പരാതിയില്ലെന്ന് അദ്ദേഹം പറഞ്ഞു. സംസ്ഥാന സര്ക്കാരിലും പൊലീസിലും പൂര്ണ വിശ്വാസമുണ്ട്. തനിക്ക് ആരോടും പരാതിയില്ല. ഈ പ്രതിക്ക് ശിക്ഷ അടക്കം ഉറപ്പാക്കിയ ശേഷമേ നാട്ടിലേക്ക് തിരികെ പോകൂ എന്നും പിതാവ് പറഞ്ഞു.
ശനിയാഴ്ചയാണ് ആലുവ തായിക്കാട്ടുകരയില് നിന്ന് കാണാതായ ബീഹാര് സ്വദേശിയായ അഞ്ച് വയസുകാരി ക്രൂരമായി പീഡനത്തിനിരയായി കൊല്ലപ്പെട്ട നിലയില് കണ്ടെത്തിയത്. ചാക്കില്കെട്ടി ഉപേക്ഷിച്ച നിലയാലായിരുന്നു മൃതദേഹം. കുട്ടിയെ വീട്ടില് നിന്ന് തട്ടിക്കൊണ്ടു പോയാണ് കൊലപ്പെടുത്തിയത്.
ആലുവ മാര്ക്കറ്റിന് പിന്വശത്ത് നിന്നാണ് മൃതദേഹം കണ്ടെടുത്തത്. പീഡനത്തിന് ശേഷം കുട്ടി ധരിച്ചിരുന്ന വസ്ത്രം കൊണ്ട് കഴുത്ത് ഞെരിച്ചാണ് അസ്ഫാക്ക് കൊലപ്പെടുത്തിയത്. പ്രതിയെ കസ്റ്റഡിയില് എടുത്തിട്ടുണ്ട്.