അബുദാബി വിമാനത്താവളത്തിൽ മുഖം നോക്കി തിരിച്ചറിയുന്ന സംവിധാനം ഏർപ്പെടുത്തുവെന്ന് അധികൃതർ. പാസ്പോർട്ട് അടക്കമുള്ള രേഖകൾ കാണിക്കാതെ ഇമിഗ്രേഷൻ നടപടികൾ പൂർത്തിയാക്കാനാണ് ഈ സംവിധാനം. നേരത്തേ ദുബായ് വിമാനത്താവളത്തത്തിലും സമാനമായ സംവിധാനം ഏർപ്പെടുത്തിയിരുന്നു.
സ്പർശന രഹിത ബയോമെട്രിക് സംവിധാനം ഘട്ടം ഘട്ടമായാണ് അബുദാബി വിമാനത്താവളത്തിൽ നടപ്പിലാക്കുക. വിമാനത്തവളത്തിലെത്തുന്ന യാത്രക്കാർ നിയമപരമായി യാത്രചെയ്യാൻ തടസ്സമില്ലാത്തവരാണോ എന്ന് തിരിച്ചറിയാൻ അത്യാധുനിക ക്യാമറകൾ ഉപയോഗിക്കുന്നതാണ് ഈ സംവിധാനം.
അബുദാബി വിമാനത്താവളത്തിലെ അമേരിക്കയിലേക്കുള്ള യാത്രക്കാരുടെ ഇമിഗ്രേഷൻ നടപടികൾ പൂർത്തിയാക്കുന്ന യു എസ് കസ്റ്റംസ് ആൻഡ് ബോർഡർ പ്രൊട്ടക്ഷനിൽ പരീക്ഷണാടിസ്ഥാനത്തിൽ പുതിയ സംവിധാനം നേരത്തേ സ്ഥാപിച്ചിട്ടുണ്ട്. അതേസമയം സാങ്കേതിക വിദ്യ പ്രയോജനപ്പെടുത്തുന്ന ആദ്യ എയർലൈനായി ഇത്തിഹാദ് എയർവേസ് മാറും. ഈ മാസം 15 മുതൽ ഓരോ ആഴ്ചയും 11 സർവീസുകളാണ് ഇത്തിഹാദ് എയർവേയ്സ് യു എസിലെ ജോൺ എഫ് കെന്നഡി അന്താരാഷ്ട്ര വിമാനത്താവളത്തിലേക്ക് നടത്തുന്നത്.