ആത്മഹത്യയ്ക്ക് ശ്രമിച്ചതിന് പന്തീരാങ്കാവ് യുഎപിഎ കേസിലെ പ്രതി അലന്‍ ഷുഹൈബിനെതിരെ പൊലീസ് കേസെടുത്തു. അമിത അളവില്‍ ഉറക്കഗുളിക കഴിച്ച നിലയില്‍ അലന്‍ ഷുഹൈബിനെ ഇന്നലെ ഫ്‌ളാറ്റില്‍ കണ്ടെത്തുകയായിരുന്നു.
ബുധനാഴ്ച പുലര്‍ച്ചെയോടെയാണ് കൊച്ചിയിലെ ഫ്‌ളാറ്റില്‍ അവശനിലയില്‍ കണ്ടെത്തിയത്. നിലവില്‍ കൊച്ചി സണ്‍റൈസ് ആശുപത്രിയില്‍ ചികിത്സയിലാണ്. അപകടനില തരണം ചെയ്തതായി അടുത്ത വൃത്തങ്ങള്‍ അറിയിച്ചു.
ആത്മഹത്യയ്ക്ക് ശ്രമിക്കുന്നതിന് മുമ്പ് സുഹൃത്തുക്കള്‍ക്ക് അലന്‍ കുറിപ്പ് അയച്ചിരുന്നു. തന്നെ കൊല്ലുന്നത് സിസ്റ്റമാണെന്നും കടന്നാക്രമണത്തിന്റെ കാലത്ത് താന്‍ കൊഴിഞ്ഞു പോയ പൂവാണെന്നും അലന്‍ സുഹൃത്തുക്കള്‍ക്കയച്ച കുറിപ്പില്‍ പറയുന്നു.
2019 നവംബര്‍ ഒന്നിനാണ് സിപിഎം പ്രവര്‍ത്തകരായ അലന്‍ ഷുഹൈബിനെയും താഹ ഫസലിനെയും മാവോയിസ്റ്റ് ബന്ധം ആരോപിച്ച് യുഎപിഎ ചുമത്തി പൊലീസ് അറസ്റ്റ് ചെയ്തത്.
