മസ്കത്ത്: ഒമാനിൽ ബലിപെരുന്നാൾ ജൂൺ 16ന് ആകാൻ സാധ്യതയെന്ന് ജ്യോതിശാസ്ത്ര വിദഗ്ധർ അറിയിച്ചു. ഒമാനിലും സൗദി അറേബ്യയിലും ജൂൺ 15ന് അറഫ ദിനവും ജൂൺ 16ന് ബലിപെരുന്നാളും വരാനാണ് സാധ്യതയെന്ന് ജ്യോതിശാസ്ത്ര വിദഗ്ധരെ ഉദ്ധരിച്ച് ‘ഒമാൻ ഒബ്സർവർ’ റിപ്പോർട്ട് ചെയ്യുന്നത്.
ഇതനുസരിച്ച് ഒമാനിൽ ബലിപെരുന്നാൾ പൊതു അവധി ദിവസങ്ങൾ ജൂൺ 16 മുതൽ 20 വരെയാകും (ഞായറാഴ്ച മുതൽ വ്യാഴാഴ്ച). അങ്ങനെ വന്നാൽ വാരാന്ത്യ അവധി ദിവസങ്ങൾ കൂടി കഴിഞ്ഞ ശേഷം ജൂൺ 23ന് ആകും പ്രവൃത്തി ദിവസം പുനരാരംഭിക്കുക.
ബലിപെരുന്നാളിൻറെ പൊതു അവധിക്ക് മുമ്പും ശേഷവുമുള്ള വാരാന്ത്യ അവധികൾ കൂടി കണക്കാക്കുമ്പോൾ ബലി പെരുന്നാൾ കാലത്ത് തുടർച്ചയായി ഒൻപത് ദിവസം ഒഴിവ് ലഭിക്കുമെന്നാണ് കരുതുന്നത്. ഇക്കാര്യത്തിൽ ഒമാൻ ഭരണകൂടത്തിൽ നിന്നുള്ള ഔദ്യോഗിക പ്രഖ്യാപനത്തിനായി കാത്തിരിക്കുകയാണ് സ്വദേശികളും പ്രവാസികളും.