ഇതിന്റെ കാലാവധി കഴിഞ്ഞ് പതിനഞ്ച് വര്‍ഷത്തിന് ശേഷം മ്യൂസിയത്തില്‍ വെച്ചാല്‍ കേരള മുഖ്യമന്ത്രിയും മറ്റു മന്ത്രിമാരും സഞ്ചരിച്ച വാഹനം എന്ന നിലയില്‍ കാണാന്‍ വേണ്ടി ലക്ഷക്കണക്കിനാളുകള്‍ എത്തുമെന്ന് സിപിഐഎം നേതാവ് എ കെ ബാലന്‍.
നവ കേരള സദസ്സിനായുള്ള ബസ് ആഢംബര വാഹനമെന്നത് കള്ള പ്രചാരണമാണെന്നും വാഹനം ടെന്‍ഡര്‍ വിളിച്ച് വില്‍ക്കാന്‍ നിന്നാല്‍ ഇപ്പോള്‍ വാങ്ങിയതിന്റെ ഇരട്ടി വില കിട്ടുമെന്നും അദ്ദേഹം പറഞ്ഞു.
നവകേരള സദസ്സ് എന്നത് ചരിത്ര സംഭവമാണ്. ചലിക്കുന്ന ക്യാബിനറ്റ് എന്നത് ലോകചരിത്രത്തില്‍ തന്നെ ആദ്യത്തെ സംഭവമാകും. ഇതിനെ തകര്‍ക്കാനാണ് ആഢംബര ബസ് എന്ന പ്രചാരണം നടത്തുന്നത് എന്നും ഇനിയെങ്കിലും അത്തരത്തിലുള്ള പ്രചാരണം നടത്തുന്നത് അവസാനിപ്പിക്കണമെന്നും ബാലന്‍ പറഞ്ഞു.
പ്രതിപക്ഷം നവകേരള സദസ്സില്‍ നിന്ന് മാറിനില്‍ക്കേണ്ട ഗതികേടിലേക്ക് എത്തിയതാണ്. ഇപ്പോള്‍ മൂന്ന് പ്രതിപക്ഷ നേതാക്കളാണ് കേരളത്തലിുള്ളത്. ഉച്ചവരെ വി.ഡി സതീശന്‍. ഉച്ചയ്ക്ക് ശേഷം രമേശ് ചെന്നിത്തല, രാത്രി ബിജെപി അധ്യക്ഷന്‍ കെ സുരേന്ദ്രന്‍ എന്നിവരാണ് മൂന്ന് പ്രതിപക്ഷ നേതാക്കള്‍ എന്നും എ കെ ബാലന്‍ പരിഹസിച്ചു.
