താൻ വീണ്ടും വിവാഹിതയായെന്ന് വെളിപ്പെടുത്തി നടി ലെന. ഗഗൻയാൻ ഗ്രൂപ്പ് ക്യാപ്റ്റൻ പ്രശാന്തുമായി കഴിഞ്ഞ മാസം തൻ്റെ വിവാഹം കഴിഞ്ഞുവെന്നാണ് നടിയുടെ വെളിപ്പെടുത്തൽ.
ഇന്ത്യൻ ബഹിരാകാശ ദൗത്യമായ ഗഗൻയാൻ മിഷനെ നയിക്കുന്ന ക്യാപ്റ്റൻ പ്രശാന്ത് ബാലകൃഷ്ണൻ നായരെ ഇന്നാണ് പ്രധാനമന്ത്രി നരേന്ദ്രമോദി രാജ്യത്തിന് പരിചയപ്പെടുത്തിയത്. പാലക്കാട് നെന്മാറ പഴയ ഗ്രാമം സ്വദേശിയായ പ്രശാന്ത് ബാലകൃഷ്ണൻ ഇന്ത്യൻ വ്യോമസേനയിൽ സീനിയർ പൈലറ്റാണ്. 2024 ജനുവരി 27-ന് അടുത്ത കുടുംബാംഗങ്ങൾ മാത്രം പങ്കെടുത്ത ഒരു സ്വകാര്യ ചടങ്ങിൽ വച്ചാണ് താൻ വിവാഹിതയായതെന്ന് ലെന ഇൻസ്റ്റാഗ്രാം പോസ്റ്റിലൂടെ വെളിപ്പെടുത്തി. പ്രശാന്തിന് ഏറെ പ്രധാനപ്പെട്ട ഈ ദിവസത്തിൽ ഈ വിശേഷം പങ്കുവയ്ക്കാനായി താൻ കാത്തിരിക്കുകയായിരുന്നുവെന്നും നടി പറഞ്ഞു.
ഇന്ത്യൻ നിർമ്മിത റോക്കറ്റിൽ ഇന്ത്യക്കാരായ നാല് പേരെ ബഹിരാകാശത്ത് എത്തിക്കാൻ ലക്ഷ്യമിട്ടുള്ള ഇസ്രോ പദ്ധതിയാണ് മിഷൻ ഗഗൻയാൻ. ഗഗൻയാൻ പദ്ധതിയിലേക്ക് തെരഞ്ഞെടുക്കപ്പെട്ട നാല് ബഹിരാകാശ സഞ്ചാരികളെ ചൊവ്വാഴ്ച തുമ്പയിലെ ഇസ്രോ സ്പേസ് സെൻ്ററിൽ വച്ചു നടന്ന ചടങ്ങിൽ പ്രധാനമന്ത്രി നരേന്ദ്രമോദി രാജ്യത്തിന് പരിചയപ്പെടുത്തിയിരുന്നു. മലയാളിയും ഇന്ത്യൻ വ്യോമസേനയിൽ ഗ്രൂപ്പ് ക്യാപ്റ്റനുമായ പ്രശാന്ത് ബാലകൃഷ്ണൻ നായർ, അജിത്ത് കൃഷ്ണൻ, അംഗദ് പ്രതാപ്, വിംഗ് കമാൻഡർ ശുബാൻഷു ശുക്ല എന്നിവരുമാണ് ഇന്ത്യയുടെ സ്വപ്ന പദ്ധതിയുടെ ഭാഗമായി ബഹിരാകാശയാത്ര നടത്തുക. ഇവർക്കുള്ള പരിശീലനപരിപാടികൾ നേരത്തെ റഷ്യയിൽ പൂർത്തിയായിരുന്നു.