ഡ്രൈവിങ്ങിലെ ഗുരുതര വീഴ്ചകൾക്ക് ലഭിക്കുന്ന ബ്ലാക്ക്പോയിന്റ്സ് ഒഴിവാക്കാൻ അവസരമൊരുക്കിയിരിക്കുകയാണ് യുഎ യിലെ ആഭ്യന്തര മന്ത്രാലയം.
യുഎഇ യിൽ പുതിയ അധ്യയന വർഷം ആരംഭിക്കുന്ന ഓഗസ്റ്റ് 28 ന് സുരക്ഷിതമായി വാഹനം ഓടിക്കുന്ന ആളുകൾക്കാണ് 4 ബ്ലാക്ക്പോയിന്റുകൾ ഇല്ലാതാക്കാൻ സാധിക്കുക.
ആഭ്യന്തര മന്ത്രാലയത്തിന്റെ വെബ്സൈറ്റിൽ കയറിയോ സമൂഹമാധ്യമങ്ങളിലെ ഒഫീഷ്യൽ പേജുകളിലെ ക്യു ആർ കോഡ് സ്കാൻ ചെയ്തോ വെബ്സൈറ്റിൽ പ്രവേശിക്കാം. ശേഷം കാണുന്ന ആക്സിഡന്റ് ഫ്രീ പദ്ധതിയിൽ ഭാഗമാകകണം. സ്കൂൾ തുറക്കുന്ന ദിവസം അതായത് ഓഗസ്റ്റ് 28 ന് ശ്രദ്ധയോടെ മാത്രമേ വാഹനമോടിക്കുകയുള്ളു എന്ന് പ്രതിജ്ഞയെടുത്ത് അതിൽ ഒപ്പ് വെക്കണം. കൂടാതെ ഓഗസ്റ്റ് 28 ന് യാതൊരു വിധ ഗതാഗത നിയമലംഘനങ്ങളിലും ഏർപ്പെടാതിരിക്കുകയും വേണം. എങ്കിൽ ലൈസൻസിൽ നിന്നും 4 ബ്ലാക്ക്പോയിന്റുകൾ ഇല്ലാതാകും.
രാജ്യത്തുടനീളം ഓഗസ്റ്റ് 28 ‘അപകടരഹിത ദിനം’ ആയി ആചരിക്കുന്നതിന്റെ ഭാഗമായാണ് ഈ പദ്ധതി. സ്കൂൾ തുറക്കുന്ന ദിവസമായതിനാലാണ് അപകടങ്ങളൊന്നുമില്ലാത്ത ദിവസമാക്കി മാറ്റാൻ അധികൃതർ ശ്രമിക്കുന്നത്.