ദോഹ: ഖത്തറിൽ ഇന്നും നാളെയും ശക്തമായ കാറ്റ് വീശുമെന്ന മുന്നറിയിപ്പുമായി കാലാവസ്ഥ വിഭാഗം. കഴിഞ്ഞ ഏതാനും ദിവസങ്ങളായി തുടരുന്ന കാറ്റ് വ്യാഴാഴ്ച മുതൽ ശനിയാഴ്ച വരെ കൂടുതൽ ശക്തിയോടെ വീശുമെന്നാണ് മുന്നറിയിപ്പ്.
ശക്തമായ കാറ്റിനെ തുടർന്ന് പൊടിപടലങ്ങൾ ഉയരാൻ സാധ്യതയുണ്ടെന്നും ഇതു കാരണം റോഡിലെ കാഴ്ച പരിധി കുറഞ്ഞേക്കാമെന്നും അധികൃതർ മുന്നറിയിപ്പ് നൽകി. കാറ്റ് കാരണം കടൽ കൂടുതൽ പ്രക്ഷുബ്ധമാവാനും സാധ്യതയുണ്ടെന്നും പൊതുജനങ്ങളും വാഹനയാത്രക്കാരും കടൽതീരത്ത് എത്തുന്നവരും ഈ ദിവസങ്ങളിൽ ജാഗ്രത പാലിക്കണമെന്നും അധികൃതർ കൂട്ടിച്ചേർത്തു.
അതേസമയം കുവൈത്തിൽ ഏപ്രിൽ അവസാനം വരെ മഴ പെയ്യാൻ സാധ്യതയുണ്ടെന്ന് കാലാവസ്ഥ നിരീക്ഷണ വിഭാഗം പറഞ്ഞു. വാരാന്ത്യത്തിൽ പകൽ ചൂടും രാത്രിയിൽ മിതമായ കാലാവസ്ഥയുമായിരിക്കുമെന്ന് കാലാവസ്ഥാ നിരീക്ഷണ കേന്ദ്രം പ്രവചിക്കുന്നു. കാറ്റ് വടക്കുപടിഞ്ഞാറ് ദിശയിൽ നിന്ന് മാറി വീശും, വേഗത കുറഞ്ഞതും ഇടത്തരവും ആയിരിക്കും, ചിലപ്പോൾ ശക്തമാകും, തുറന്ന പ്രദേശങ്ങളിൽ പൊടി ഉയരാൻ സാധ്യതയുണ്ടെന്നും കാലാവസ്ഥ വകുപ്പ് അറിയിച്ചിട്ടുണ്ട്.
