പ്ലസ്ടു റിസള്‍ട്ട് പിന്‍വലിച്ചതായി വ്യാജ വീഡിയോ തയ്യാറാക്കിയ യൂട്യൂബര്‍ അറസ്റ്റില്‍. ബിജെപി പ്രവര്‍ത്തകന്‍ കൂടിയായ നിഖില്‍ മനോഹറാണ് അറസ്റ്റിലായത്. കൊല്ലം ജില്ലയിലെ പോരുവഴി പഞ്ചായത്തിലെ എട്ടാം വാര്‍ഡിലെ ബിജെപി മെമ്പര്‍കൂടിയാണ് നിഖില്‍ മനോഹര്‍.
വി കാന്‍ മീഡിയ ( we can media ) എന്ന യൂട്യൂബ് ചാനല്‍ വഴിയാണ് വീഡിയോ പ്രചരിപ്പിച്ചത്. നിഖിലിനെ തിരുവനന്തപുരം കന്റോണ്‍മെന്റ് പൊലീസ് അറസ്റ്റ് ചെയ്തു.
പരീക്ഷാഫലത്തില്‍ അപാകതകള്‍ ഉണ്ട്, അതിനാല്‍ പരീക്ഷാഫലം പിന്‍വലിച്ചു എന്ന് ചൂണ്ടിക്കാണിച്ചാണ് നിഖില്‍ വ്യാജ വീഡിയോ തയ്യാറാക്കി പ്രചരിപ്പിച്ചത്. ഇതിന് പിന്നാലെ വിദ്യാഭ്യാസ മന്ത്രിയുടെ ഓഫീസ് കന്റോണ്‍മെന്റ് പൊലീസില്‍ പരാതി നല്‍കുകയായിരുന്നു.
കഴിഞ്ഞ ദിവസം രാത്രി ഇയാളെ പൊലീസ് അറസ്റ്റ് ചെയ്തു. ഇന്ന് കോടതിയില്‍ ഹാജരാക്കും. രാഷ്ട്രീയ പ്രേരിതമായാണ് ഇത്തരത്തില്‍ ഒരു വീഡിയോ തയ്യാറാക്കി പ്രചരിപ്പിച്ചതിന് പിന്നിലെന്ന് പൊലീസ് പറഞ്ഞു.
