സമൂഹത്തിന്റെ ഏറ്റവും പ്രധാനപ്പെട്ട ഘടകമായ കുടുംബത്തില് ഒരുപാട് പ്രശ്നങ്ങളുണ്ടെന്ന് സംവിധായകന് ജിയോ ബേബി. സ്ത്രീകള് അവിടെ സന്തുഷ്ടരല്ലെന്നാണ് ജിയോ ബേബി പറയുന്നത്. പിടിഐയ്ക്ക് നല്കിയ അഭിമുഖത്തിലായിരുന്നു ജിയോ ബേബി ഇക്കാര്യം പറഞ്ഞത്.
ജിയോ ബേബി പറഞ്ഞത് :
എന്റെ സമൂഹം എന്നെ ഒരുപാട് തലത്തില് എഫക്ട് ചെയ്യുന്നുണ്ട്. അതുകൊണ്ടാണ് ഞാന് അതിനെ കൂടുതല് എക്സ്പ്ലോര് ചെയ്യുന്നത്. സമൂഹത്തിലെ ഏറ്റവും പ്രധാനപ്പെട്ട ഘടകം കുടുംബമാണ്. അതില് ഒരുപാട് പ്രശ്നങ്ങള് ഉണ്ട്. സ്ത്രീകള് സന്തുഷ്ടരല്ല അവിടെ. അതുകൊണ്ടാണ് ഞാന് എപ്പോഴും സമൂഹത്തെയും കുടുംബത്തെയും കുറിച്ച് ചിന്തിക്കുന്നത്. എനിക്ക് അത് രണ്ടും മികച്ചതാവണമെന്നുണ്ട്. എല്ലാ തലത്തിലും എല്ലായിടത്തും സ്ത്രീകളുടെ കാഴ്ച്ചപ്പാട് പ്രധാനമാണ്. പക്ഷെ തീരുമാനം എടുക്കുന്നത് കൂടുതലും പുരുഷന്മാരാണ്.
ഞാന് ഗ്രേറ്റ് ഇന്ത്യന് കിച്ചനില് നിന്ന് ഒരുപാട് കാര്യങ്ങള് പഠിച്ചു. എന്റെ മാതാപിതാക്കള് എന്നെ നല്ല രീതിയിലാണ് വളര്ത്തിയതെന്നാണ് ഞാന് വിശ്വസിക്കുന്നത്. പക്ഷെ ഫെമിനിസ്റ്റ് ആവുക എന്നത് വളരെ മെല്ലെ നടന്ന ഒരു കാര്യമായിരുന്നു. അത് ഗ്രേറ്റ് ഇന്ത്യന് കിച്ചന് ശേഷവും തുടര്ന്നുകൊണ്ടിരുന്നു.
ഞാന് ഹൈസ്കൂളില് പഠിക്കുന്ന സമയത്ത് എന്റെ അച്ഛനും അമ്മയും എന്നെ കൊണ്ട് പാത്രം കഴുകിപ്പിച്ചിട്ടുണ്ട്. അന്ന് ഞാന് തിരിച്ചറിഞ്ഞു അത് എത്ര വേദനയുള്ള പണിയാണെന്ന്. അന്ന് ഞാന് ചിന്തിച്ചു, എന്തുകൊണ്ടാണ് ഇത് സ്ത്രീകളുടെ മാത്രം ചുമതലയാവുന്നതെന്ന്.
പക്ഷെ യഥാര്ത്ഥ മാറ്റം സംഭവിക്കുന്നത് എന്റെ വിവാഹത്തിന് ശേഷമാണ്. എന്റെ ഭാര്യ ആ സമയത്ത് പഠിക്കുകയായിരുന്നു. അതിനാല് എനിക്ക് അടുക്കളയില് കൂടുതല് ഇടപെടേണ്ടി വന്നു. ഞാന് സ്ത്രീകള് എഴുതിയ പുസ്തകങ്ങള് വായിക്കാന് തുടങ്ങി. ഫേസ്ബുക്കില് ഫെമിനിസ്റ്റ് എഴുത്തുകാരെ ഫോളോ ചെയ്യാനും തുടങ്ങി. അങ്ങനെ ഞാനും ഒരു ഫെമിനിസ്റ്റ് ആയി. അതാണ് എന്റെ അനുഭവം.
ഞാന് അടുക്കളയെ കുറിച്ചും വീട്ടിലെ മറ്റ് കാര്യങ്ങളെ കുറിച്ചും പഠിച്ചു. അതില് നിന്ന് എല്ലായിടത്തും സ്ത്രീകളുണ്ടെന്ന് എനിക്ക് മനസിലായി. അത് വിവേചനമാണ്. അത് ഞാന് തിരിച്ചറിഞ്ഞു.