വിദേശ പൗരന്മാർക്ക് ഈ വർഷം ഉംറ വിസ അനുവദിക്കുന്നതിനുള്ള അവസാന തീയതി ജൂൺ 5 വരെ നീട്ടി ഹജ്ജ്, ഉംറ മന്ത്രാലയം. ജൂൺ 5 വരെയുള്ള ദിവസങ്ങളിൽ ഉംറ വിസ ലഭിച്ചവർക്ക് ജൂൺ 17 വരെ സൗദി അറേബ്യയിൽ തങ്ങാൻ അനുമതിയുണ്ട്. ഉംറ തീർഥാടകർക്ക് സൗദി അറേബ്യ വിടാനുള്ള അവസാന തീയതി ജൂൺ 18 ആണ്.
ഉംറ വിസയുടെ കാലാവധി ഈ വർഷം മുതൽ 90 ദിവസമാക്കി ഉയർത്തിരുന്നു. മുമ്പ് ഉംറ വിസയ്ക്ക് 30 ദിവസത്തെ അനുമതി മാത്രമാണ് നൽകിയിരുന്നത്. ഉംറ വിസയുള്ളവർക്ക് സൗദി അറേബ്യയിലെ എല്ലാ പ്രദേശങ്ങളും നഗരങ്ങളും ചരിത്രപരവും മതപരവും തീർത്ഥാടന കേന്ദ്രങ്ങളും സന്ദർശിക്കാനും അനുമതിയുണ്ട്.
ഉംറ പാക്കേജുകൾ സ്വയം തിരഞ്ഞെടുക്കുന്നതിനും ബുക്കുചെയ്യുന്നതിനും ഓൺലൈനിൽ എളുപ്പത്തിൽ വിസ നേടുന്നതിനുമായി നുസുക്ക് പ്ലാറ്റ്ഫോമിലൂടെ ഹജ്ജ്, ഉംറ മന്ത്രാലയം 121 സേവനങ്ങൾ നൽകിയിട്ടുണ്ട്. ഉംറ വിസയുടെ കാലാവധി 90 ദിവസമായി വർധിപ്പിച്ചതിനാൽ പ്രവാസികൾക്ക് ഏറെ പ്രയോജനം ലഭിക്കുമെന്നാണ് അധികൃതരുടെ വിലയിരുത്തൽ.