സുഡാനിലുണ്ടായ പേമാരിയിലും വെള്ളപ്പൊക്കത്തിലും ദുരിതമനുഭവിക്കുന്നവർക്ക് ദുരിതാശ്വാസ സഹായങ്ങളുമായി യു എ ഇ യിൽ നിന്ന് ഖാർതൂമിലേക്ക് എയർ ബ്രിഡ്ജുകൾ പ്രവർത്തനമാരഭിച്ചു. പ്രസിഡന്റ് ഹിസ് ഹൈനസ് ഷെയ്ക്ക് മുഹമ്മദ് ബിൻ സായിദ് അൽ നഹ്യാൻ, അൽ ദഫ്ര മേഖലയിലെ ഭരണാധികാരി പ്രതിനിധിയും എമിറേറ്റ്സ് റെഡ് ക്രെസെന്റ് (ERC ) ചെയർമാനുമായ ഷെയ്ക്ക് ഹംദാൻ ബിൻ സായിദ് അൽ നഹ്യാൻ എന്നിവരുടെ മേൽനോട്ടത്തിലാണ് ദുരിതാശ്വാസ സഹായം ഏർപ്പെടുത്തുന്നത്.
30 ടണ്ണിന്റെ വിവിധ ഷെൽട്ടർ സാമഗ്രികളുമായി ആദ്യത്തെ വിമാനം പുറപ്പെട്ടിട്ടുണ്ട്. മൂന്ന് വിമാനങ്ങൾ കൂടി പുറപ്പെടാനൊരുങ്ങുന്നുവെന്നും അധികൃതർ വ്യക്തമാക്കി. സുഡാനിലെ ഇ ആർ സി പ്രതിനിധികൾ ഇവ സ്വീകരിക്കും. ദുരിതമനുഭവിക്കുന്നവർക്ക് പിന്തുണയും സഹായങ്ങളുമായി ഇ ആർ സി സംഘം നേരത്തേ തന്നെ സുഡാനിൽ എത്തിയിരുന്നു.