ടിക് ടോക്കിൽ അശ്ലീലകരമായ ഉള്ളടക്കത്തോട് കൂടിയുള്ള വീഡിയോ പോസ്റ്റ് ചെയ്തതിന് അഞ്ച് ഫിലിപ്പിനോ യുവതികൾ ഷാർജയിൽ അറസ്റ്റിലായി. ദുബായിലെ ഫിലിപ്പീൻസ് കോൺസുലേറ്റ് ജനറൽ അറസ്റ്റ് സംബന്ധിച്ച വാർത്ത സ്ഥിരീകരിച്ചു.
തമാശയ്ക്ക് ഷൂട്ട് ചെയ്ത് അപ്ലോഡ് ചെയ്ത വീഡിയോ ആണ് ഫിലിപ്പിനോ യുവതികൾക്ക് കുരുക്കായത് എന്നും വീഡിയോ സൃഷ്ടിച്ചേക്കാവുന്ന നിയമപ്രശ്നങ്ങളെക്കുറിച്ച് ഇവർക്ക് ധാരണയുണ്ടായിരുന്നില്ലെന്നും അറസ്റ്റിലായ ഒരാളുടെ സഹോദരനെ ഉദ്ധരിച്ച് ഫിലിപ്പിനോ മാധ്യമങ്ങൾ റിപ്പോർട്ട് ചെയ്തു.
കേസ് നിലവിൽ ഷാർജ പബ്ലിക് പ്രോസിക്യൂഷന്റെ അന്വേഷണത്തിലാണെന്ന് ദുബായിലെയും നോർത്തേൺ എമിറേറ്റിലെയും ഫിലിപ്പൈൻ കോൺസൽ ജനറൽ റെനാറ്റോ ഡ്യൂനാസ് ജൂനിയർ പറഞ്ഞു. അറസ്റ്റിലായവർക്ക് ആവശ്യമായ നിയമസഹായം നൽകുമെന്നും ഡ്യൂനാസ് അറിയിച്ചു. യുഎഇയിലെ ഫിലിപ്പിനോ പൗരൻമാർ രാജ്യത്തെ ആചാരങ്ങളും പൊതുനിയമങ്ങളും മര്യാദകളും പാലിക്കാൻ ശ്രദ്ധിക്കണമെന്നും സമൂഹ മാധ്യമങ്ങളിൽ പങ്കുവയ്ക്കുന്ന പോസ്റ്റുകളിൽ അതീവ ശ്രദ്ധ വേണമെന്നും കോൺസുലേറ്റ് ജനറൽ പറഞ്ഞു.