തൊഴിലിടങ്ങളില്‍ സ്ത്രീകള്‍ക്കെതിരായ അതിക്രമം തടയല്‍ നിയമം (പോഷ് ആക്ട്) കര്‍ശനമായി നടപ്പാക്കത്തില്‍ അതൃപ്തി അറിയിച്ച് സുപ്രീം കോടതി. നിയമം വന്ന് പത്ത് വര്‍ഷയമായിട്ടും വ്യവസ്ഥകള്‍ കൃത്യമായി നടപ്പാക്കുന്നില്ലെന്ന് കോടതി നിരീക്ഷിച്ചു. നിയമം കര്‍ശനമായി പാലിക്കാന്‍ കേന്ദ്ര സര്‍ക്കാരിനും സംസ്ഥാന സര്‍ക്കാരുകള്‍ക്കും സുപ്രീം കോടതി നിര്‍ദേശം നല്‍കുകയും ചെയ്തു.
ജഡ്ജിമാരായ ഹിമാ കോഹ്ലി, ബേല എം ത്രിവേദി എന്നിവരടങ്ങിയ ബെഞ്ചാണ് ഉത്തരവ് പുറപ്പെടുവിച്ചത്. പൊതു മേഖലാ സ്ഥാപനങ്ങളില്‍, സംസ്ഥാനങ്ങളില്‍, സര്‍വകലാശാലകളില്‍, കമ്മീഷനുകളില്‍, സ്വകാര്യ സ്ഥാപനങ്ങളില്‍ അടക്കം നിയമം നടപ്പാക്കണം.
നിയമത്തിന്റെ വ്യവസ്ഥകള്‍ എല്ലാവരും അറിഞ്ഞിരിക്കണം. ഇത് സംബന്ധിച്ച് അവബോധപരിപാടികള്‍ സംഘടിപ്പിക്കണമെന്നും സുപ്രീം കോടതി നിര്‍ദേശിച്ചു.
