നവംബർ 20 മുതൽ ദോഹയിൽ അരങ്ങേറുന്ന ഫിഫ ലോകകപ്പിനെത്തുന്നവർക്ക് സൗദി അറേബ്യ സന്ദർശക വിസ നൽകിത്തുടങ്ങി. ‘ഹയ്യ കാർഡ്’ ഉടമകൾക്കാണ് സൗദി അറേബ്യയിൽ പ്രവേശിക്കാനുള്ള സന്ദർശക വിസകള് നൽകുന്നത്.
ലോകമെമ്പാടുമുള്ള കാൽപ്പന്ത് പ്രേമികളെ രാജ്യത്തേക്ക് സ്വാഗതം ചെയ്യുന്നതിനായി സൗദി വിദേശകാര്യ മന്ത്രാലയം സന്ദർശക വിസ സൗജന്യമായി നൽകുമെന്ന് പ്രഖ്യാപിച്ചിരുന്നു. ഇതിൻ്റെ ഇലക്ട്രോണിക് സേവനമാണ് ഞായറാഴ്ച തുടങ്ങിയത്.
ഈ വിസ ലഭിക്കുന്നവർക്ക് നവംബർ 11 മുതൽ സൗദിയിലെ ഏത് വിമാനത്താവളത്തിലും ഇറങ്ങാം. 60 ദിവസം വരെ രാജ്യത്ത് താമസിക്കുകയും ചെയ്യാം. എത്ര തവണ വേണമെങ്കിലും രാജ്യം വിട്ടുപോവുകയും മടങ്ങി വരികയും ചെയ്യാം. സൗദിയിൽ എത്തുന്നതിന് മുമ്പ് ഖത്തറിൽ പ്രവേശിച്ചിരിക്കണമെന്ന വ്യവസ്ഥയുമില്ല.
ഹയ്യ കാർഡ് ഉടമകൾക്ക് സൗദി ഏകീകൃത വിസ പ്ലാറ്റ് ഫോം വഴി അപേക്ഷിക്കാമെന്ന് മന്ത്രാലയം അറിയിച്ചു.
https://visa.mofa.gov.sa എന്ന ലിങ്ക് ഉപയോഗിച്ചാൽ മതി.
ആരോഗ്യ ഇൻഷുറൻസ് നടപടികൾ പൂർത്തിയാക്കിയ ശേഷം അപേക്ഷിച്ചാൽ ഓൺലൈനായി വിസ ലഭിക്കും.