സൗദിയിലെ ദക്ഷിണപ്രദേശമായ അസീറിലെ ഇന്ത്യൻ സമൂഹം നേരിടുന്ന പ്രശ്നങ്ങൾക്ക് പ്രാധാന്യം നൽകിക്കൊണ്ട് ഉടൻ പരിഹാരം ഉണ്ടാവുമെന്ന് ഇന്ത്യൻ കോൺസുലേറ്റ് വെൽഫെയർ കോൺസൽ ജനറൽ മുഹമ്മദ് ഷാഹിദ് ആലം പറഞ്ഞു. പ്രശ്ന പരിഹാരങ്ങൾക്ക് അസീർ ഗവണ്മെന്റിന്റെ മികച്ച പിന്തുണയാണ് ലഭിക്കുന്നത്. അത്കൊണ്ട് തന്നെ നീതിയുക്തമായ പരിഹാരങ്ങൾക്ക് ഇന്ത്യൻ മിഷന് എളുപ്പത്തിൽ സാധിക്കുമെന്ന വിശ്വാസത്തിലാണ് ഇന്ത്യൻ കോൺസുലറ്റ്. അസീർ കെ എം സി സി സെൻട്രൽ കമ്മിറ്റി പ്രസിഡന്റും എൻ ആർ കെ ചെയർമാനുമായ ബഷീർ മുന്നിയുരുമായി നടത്തിയ കൂടിക്കാഴ്ചയിൽ അദ്ദേഹം പറഞ്ഞു.
മേഖലയിലെ പ്രവാസികളെ സന്ദർശിച്ച് അവരുമായി നേരിട്ട് സംവദിച്ച് പ്രശ്നങ്ങൾ അറിയാൻ ഉടൻ തന്നെ അസീറിൽ എത്തുമെന്നും ഷാഹിദ് ആലം പറഞ്ഞു. അതേസമയം ജിദ്ദയിൽ സംഘടിപ്പിച്ച രീതിയിൽ അസീറിലും ഓപ്പൺ ഹൗസ് സംഘടിപ്പിച്ച് പ്രശ്നങ്ങളുടെ ഗതി മനസിലാക്കണമെന്നുമുള്ള ബഷീറിന്റെ ആവശ്യം പരിഗണിക്കാമെന്ന് കോൺസൽ ജനറലും കമ്മ്യൂണിറ്റി വെൽഫെയർ കോൺസലും ഉറപ്പ് നൽകി.