ഇന്ത്യയിൽ പോപ്പുലർ ഫ്രണ്ടിന് നിരോധനമേർപ്പെടുത്തിയ കേന്ദ്രസർക്കാർ തീരുമാനത്തെ സ്വാഗതം ചെയ്ത് മുസ്ലീം ലീഗ് സംസ്ഥാന പ്രസിഡന്റ് സാദിഖ് അലി ശിഹാബ് തങ്ങൾ. എല്ലാ തീവ്രാവാദ സംഘടനകൾക്കും നിരോധനം ഒരുപോലെ ബാധകമാകണമെന്നും സഹിഷ്ണുതയും സാഹോദര്യവും മതേതരത്വവും ആണ് മുസ്ലിം ലീഗ് മുന്നോട്ട് വയ്ക്കുന്നതെന്നും സാദിഖ് അലി തങ്ങൾ പറഞ്ഞു.
നിരോധനത്തെ തുടർന്ന് പോപ്പുലർ ഫ്രണ്ട് ഓഫ് ഇന്ത്യയെ (പിഎഫ്ഐ) പിരിച്ചുവിട്ടുവെന്ന് പോപ്പുലർ ഫ്രണ്ട് സംസ്ഥാന ജനറൽ സെക്രട്ടറി അബ്ദുൽ സത്താർ അറിയിച്ചു. പോപ്പുലര് ഫ്രണ്ടിന്റെ ഫെയ്സ്ബുക്ക് പേജിലൂടെയാണ് അദ്ദേഹം ഇക്കാര്യം അറിയിച്ചത്. കേന്ദ്രസർക്കാർ തീരുമാനം അംഗീകരിക്കുന്നുവെന്നും പ്രവർത്തനം നിർത്താൻ എല്ലാ അംഗങ്ങളോടും അഭ്യർഥിക്കുന്നുവെന്നും അദ്ദേഹം പറഞ്ഞു.
അതേസമയം സാദിഖ് അലി ശിഹാബ് തങ്ങൾക്ക് ഇന്ന് യു എ ഇയുടെ ഗോൾഡൻ വിസ സമ്മാനിച്ചു. എമിഗ്രേഷൻ ഡയറക്ടറാണ് തങ്ങൾക്ക് ഗോൾഡൻ വിസ കൈമാറിയത്.