പുതുപ്പള്ളിയില്‍ ഉപതെരഞ്ഞെടുപ്പ് വോട്ടെണ്ണല്‍ ആരംഭിക്കുന്നതിന് മുമ്പ് തന്നെ ആഘോഷവുമായി കോണ്‍ഗ്രസ്. വോട്ടെണ്ണല്‍ കേന്ദ്രത്തിന് പുറത്താണ് യു.ഡി.എഫ് പ്രവര്‍ത്തകര്‍ ഉമ്മന് ചാണ്ടിയുടെ ബാനറുകളും മുദ്രാവാക്യം വിളികളുമായി ചാണ്ടി ഉമ്മന് വേണ്ടി ആഘോഷവുമായി എത്തിയത്.
കോട്ടയം ബെസേലിയസ് കോളേജിലാണ് വോട്ടെണ്ണല്‍ നടക്കുന്നത്. ആദ്യഘട്ടത്തില്‍ പോസ്റ്റല്‍ വോട്ടുകളാണ് എണ്ണിത്തുടങ്ങിയത്. ആദ്യ റൗണ്ട് വോട്ടുകള്‍ എണ്ണിത്തീരുമ്പോഴേക്കും ട്രെന്‍ഡ് വ്യക്തമാകും.
ആദ്യ ഫലസൂചനകള്‍ ചാണ്ടി ഉമ്മന് അനുകൂലമായാണ് വരുന്നത്. തപാല്‍ വോട്ടുകളില്‍ ഭൂരിപക്ഷം ചാണ്ടി ഉമ്മനാണ്.
രണ്ട് മണിക്കൂറിനകം ഫലമറിയാന്‍ സാധിക്കുന്ന തരത്തിലാണ് ക്രമീകരണങ്ങള്‍ നടത്തിയിരിക്കുന്നത്. 13 റൗണ്ടുകളിലായി വോട്ടിംഗ് യന്ത്രങ്ങള്‍ എണ്ണിത്തീരും. അയര്‍കുന്നം പഞ്ചായത്തിലെ 28 ബൂത്തുകളാണ് ആദ്യ രണ്ട് റൗണ്ടുകളിലായി എണ്ണുന്നത്.
അയര്‍കുന്നം, അകലകുന്നം, കൂരോപ്പട, മണര്‍കാട്, പാമ്പാടി, പുതുപ്പള്ളി, മീനടം, വാകത്താനം എന്ന ക്രമത്തിലാണ് വോട്ടെണ്ണുക.
അയര്‍ക്കുന്നം അകലകുന്നം പഞ്ചായത്തുകള്‍ കേരള കോണ്‍ഗ്രസ് എമ്മിനും കോണ്‍ഗ്രസിനും സിപിഎമ്മിനും സ്വാധീനമുള്ളവയാണ്. ഈ പഞ്ചായത്തുകളില്‍ കോണ്‍ഗ്രസ് എമ്മിന്റെ വോട്ടുകള്‍ എങ്ങോട്ട് മറിയുമെന്നത് പ്രധാനമാണ്.
കൂരോപ്പട, മണര്‍ക്കാട്, പാമ്പാടി മണ്ഡലങ്ങള്‍ കഴിഞ്ഞവര്‍ഷം യുഡിഎഫിനെ പിന്തുണച്ചിട്ടില്ല. യഥാക്രമം, 1081, 1213, 342 എന്നീ വോട്ടുകള്‍ക്ക് ഉമ്മന് ചാണ്ടി ഈ പഞ്ചായത്തുകളില്‍ പിന്നിലായിരുന്നു.
മീനടത്ത് 838 വോട്ടുകളുടെ ഭൂരിപക്ഷമാണ് കഴിഞ്ഞ തവണ ഉമ്മന് ചാണ്ടിക്ക് ലഭിച്ചത്. പുതുപ്പള്ളിയില്‍ 2399 വോട്ടുകളും വാകത്താനത്ത് 1669 വോട്ടുകളുടെ പിന്തുണയുമാണ് ലഭിച്ചത്.
