എറണാകുളം ഇലഞ്ഞിയില് പോക്സോ കേസ് പ്രതി പെണ്കുട്ടിയെ ആക്രമിച്ച ശേഷം ആത്മഹത്യ ചെയ്തു. വീട്ടില് കയറി പെണ്കുട്ടിയെ വെട്ടി പരിക്കേല്പ്പിച്ചതിന് പിന്നാലെ ആത്മഹത്യ ചെയ്യുകയായിരുന്നു. പെണ്കുട്ടിയുടെ പിതൃസഹോദരനാണ് പ്രതി. ഇയാള്ക്കെതിരെ ലൈംഗിക പീഡനത്തിന് പെണ്കുട്ടി പരാതി നല്കുകയും ചെയ്തിരുന്നു.
ശനിയാഴ്ച രാവിലെ കുട്ടി വീട്ടില് ഒറ്റയ്ക്കുള്ളപ്പോള് വീട്ടില് കയറിയ പ്രതി പെണ്കുട്ടി തുണിയലക്കുന്നതിനിടെ വാക്കത്തി ഉപയോഗിച്ച് വെട്ടുകയായിരുന്നു. പെണ്കുട്ടിയുടെ ഇടത്തേ ചെവിക്ക് പിറകില് ആഴത്തില് മുറിവുണ്ട്. പരിക്കേറ്റ പെണ്കുട്ടി കോട്ടയം മെഡിക്കല് കോളേജില് ചികിത്സയിലാണ്.
പ്രതിയ്ക്കായി പൊലീസ് അന്വേഷണം നടത്തുന്നതിനിടെയാണ് വീടിന് സമീപത്തെ റബ്ബര് തോട്ടത്തില് തൂങ്ങിമരിച്ച നിലയില് കണ്ടെത്തിയത്. ഉടനെ ആശുപത്രിയില് എത്തിച്ചെങ്കിലും മരിച്ചു.
2021ലാണ് പെണ്കുട്ടിയെ ലൈംഗികമായി പീഡിപ്പിച്ചെന്ന കേസില് ഇയാള്ക്കെതിരെ കേസെടുത്തത്. ഇതിന്റെ വൈരാഗ്യമായിരിക്കാം ആക്രമണത്തിന് പിന്നില് എന്നാണ് നിഗമനം.