ഓണമെത്തി ഒപ്പം ഓണപ്പാട്ടുകളും, മലയാളി ഗായിക അനുരാധ ജൂജുവും സംഘവും ഒരുക്കിയ ഓണപ്പാട്ട് ശ്രദ്ധേയമാകുന്നു

അമേരിക്കൻ മലയാളി ഗായിക അനുരാധ ജൂജുവും ഗ്രെയ്റ്റർ ബോസ്റ്റൺ മലയാളി സമൂഹവും ചേർന്നൊരുക്കിയ ഓണപ്പാട്ട് ‘തിരുവോണ പൂനിലാവെ’ സമൂഹമാധ്യമങ്ങളിൽ തരംഗമാകുന്നു. തിരുവാതിരയും കഥകളിയും മോഹിനിയാട്ടവും ഭാരതനാട്യവുമെല്ലാം ഇതിവൃത്തമാകുന്ന ഗാനം കേരളത്തനിമ ഒട്ടും ചോരാതെയാണ് നിർമിച്ചിരിക്കുന്നത്.

അമ്മയ്ക്ക് ഏറെ പ്രിയപ്പെട്ട ഓണം തനിമ ചോരാതെ അവതരിപ്പിക്കണമെന്ന് കരുതിയാണ് അനുരാധ ജൂജു ഓണപ്പാട്ട് നിർമിച്ചത്. ദുബായിൽ ഇരുന്ന് പ്രവീൺ എഴുതിയ വരികൾക്ക് ഈണം നൽകിയത് കൊച്ചിയിൽ നിന്ന് സംഗീത സംവിധായകൻ കമലനാണ്.ലോസ് ഏയ്ഞ്ചൽസിൽ ഇഷാൻ ചബ്ര ട്രാക്ക് തയ്യാറാക്കിയപ്പോൾ മുബൈയിൽ അഫ്താബ് ഖാൻ മിക്സിങ്ങും മാസ്റ്ററിങ്ങും നിർവഹിച്ചു. അതുകൊണ്ട് തന്നെ ലോകത്തിന്റെ പല കോണുകളിൽ ഇരിക്കുന്നവരുടെ ഓണ സമർപ്പണമാണ് ‘തിരുവോണ പൂനിലാവെ’ .ദീപ ജേക്കബും ജെയ്സൺ കെ ജോസും ചേർന്നാണ് ഗാനത്തിന് ദൃശ്യാവിഷ്‌കാരം നടത്തിയത്.

റേഡിയോ മിർച്ചി അവാർഡ് ജേതാവ് കൂടിയായ ഗായിക അനുരാധ ജൂജു ഓണത്തിന്റെ ഓർമ്മകൾ തനിക്ക് പകർന്നു തന്ന ‘അമ്മ ചിന്നിക്കാണ് ഈ ഗാനം സമർപ്പിക്കുന്നത്. ഓണത്തിന്റെ ആഘോഷവും ആവേശവുമെല്ലാം ഒത്തുചേർന്ന ഗാനം ഇതിനകം തന്നെ സോഷ്യൽ മീഡിയ ഏറ്റെടുത്തു കഴിഞ്ഞു