ബെംഗളൂരു-ചെന്നൈ എക്സ്പ്രസ് ഹൈവേ ഈ വര്ഷം അവസാനത്തോടെയോ അടുത്ത വര്ഷം ആദ്യത്തോടെയോ ഉണ്ടാകുമെന്ന് കേന്ദ്ര മന്ത്രി നിതിന് ഗഡ്കരി. ഹൈവേ സാധ്യമായാല് ചെന്നൈ-ബെംഗളൂരു നഗരങ്ങള് തമ്മിലുള്ള യാത്രാ സമയം അഞ്ച് മണിക്കൂറില് നിന്ന് രണ്ട് മണിക്കൂറായി കുറയുമെന്ന് കേന്ദ്ര മന്ത്രി അറിയിച്ചു. അശോക് ലെയ്ലാന്ഡിന്റെ 75ാം വാര്ഷികാഘോഷങ്ങളില് പങ്കെടുത്ത് സംസാരിക്കുകയായിരുന്നു മന്ത്രി.
ഡല്ഹി ചെന്നൈ, കന്യാകുമാരി, തിരുവനന്തപുരം, കൊച്ചി, ബെംഗളൂരു ഹൈദരാബാദ് എന്നീ നഗരങ്ങളെ വിവിധ ഹൈവേകള് വഴി ബന്ധിപ്പിക്കുമെന്നും മന്ത്രി പറഞ്ഞു.ചെന്നൈയെയും ഡല്ഹിയെയും പുതിയ ഹൈവേ പ്രോജക്ട് വഴി ബന്ധിപ്പിക്കുമെന്നും മന്ത്രി അറിയിച്ചു.
രാജ്യത്ത് ഇലക്ട്രിക് ബസുകള് ആവശ്യമാണ്. ഡല്ഹിയെയും ജയ്പൂരിനെയും ഇലക്ട്രിക് കേബിള് ഹൈവേ വഴി ബന്ധിപ്പിക്കാനുള്ള പ്രവര്ത്തനങ്ങളും നടന്നുവരികയാണെന്നും അശോക് ലെയ്ലാന്ഡിന്റെ എല്.ഇ.വി വാഹനങ്ങള് പുറത്തിറക്കിക്കൊണ്ട് ഗഡ്കരി പറഞ്ഞു.
2004 മുതല് കൃഷിയെ ഊര്ജ-വൈദ്യുതി മേഖലകളിലേക്ക് ബന്ധിപ്പിക്കാന് ശ്രമിക്കുന്നുണ്ട്. പത്ത് ദിവസം മുമ്പ് നൂറ് ശതമാനവും ബയോ-എഥനോള് വാഹനം പുറത്തിറക്കിയിരുന്നു. ബെംഗളൂരുവില് മെഥനോളുമായി കൂടിച്ചേര്ന്ന ഇന്ധനത്തിലൂടെ പ്രവര്ത്തിക്കുന്ന വാഹനവും പുറത്തിറക്കിയിരുന്നു. ഇന്ത്യയില് മെഥനോള് ട്രക്കുകളുടെ നിര്മാണം സാധ്യമാക്കണമെന്നതാണ് സ്വപ്നമെന്നും ഗഡ്കരി പറഞ്ഞു.