ഇന്ത്യൻ – അമേരിക്കൻ വംശജനായ നീൽ മോഹൻ യൂട്യൂബിന്റെ പുതിയ സിഇഒയായി ചുമതലയേറ്റു. മുൻ സിഇഒ സൂസൻ വോജിക്കിക്ക് പകരമായാണ് നീൽ സ്ഥാനമേൽക്കുക. കഴിഞ്ഞ ഒമ്പത് വർഷമായി യൂട്യൂബിന്റെ സിഇഒയായിരുന്നു സൂസൻ. കൂടാതെ ഗൂഗിളിൽ പരസ്യ ഉൽപ്പന്നങ്ങളുടെ സീനിയർ വൈസ് പ്രസിഡന്റായും സൂസൻ വോജിക്കി സേവനമനുഷ്ഠിച്ചിട്ടുണ്ട്.
2014-ലാണ് യൂട്യൂബിന്റെ സിഇഒ ആയി ചുമതലയേറ്റത്. അതേസമയം കുടുംബം, ആരോഗ്യം, വ്യക്തിപരമായ കാര്യങ്ങൾ എന്നീ കാരണങ്ങൾ പരാമർശിച്ചാണ് 54 കാരിയായ സൂസൻ വോജിക്കി യുടൂബിന്റെ തലപ്പത്ത് നിന്നും രാജിവെച്ചത്. അതേസമയം ഈ പ്രധാനപ്പെട്ട ദൗത്യം ഏറ്റെടുക്കാൻ സാധിച്ചതിൽ സന്തോഷമുണ്ടെന്ന് നീൽ മോഹൻ പറഞ്ഞു.
ആരാണ് നീൽ മോഹൻ
1996-ൽ അമേരിക്കയിലെ സ്റ്റാൻഡ്ഫോർഡ് യൂണിവേഴ്സിറ്റിയിൽ നിന്ന് നീൽ മോഹൻ ഇലക്ട്രിക്കൽ എഞ്ചിനീയറിംഗിൽ ബിരുദം നേടിയത്. തുടർന്ന് 2005-ൽ സ്റ്റാൻഫോർഡ് യൂണിവേഴ്സിറ്റി ഗ്രാജുവേറ്റ് സ്കൂൾ ഓഫ് ബിസിനസിൽ നിന്നും എംബിഎ പൂർത്തിയാക്കി. യൂട്യൂബിന് പുറമെ, വസ്ത്ര, ഫാഷൻ കമ്പനിയായ സ്റ്റിച്ച് ഫിക്സിൻറെ ബോർഡ് ഡയറക്ടറായും അദ്ദേഹം പ്രവർത്തിക്കുന്നുണ്ട്.
യൂട്യൂബിന്റെ ചീഫ് പ്രൊഡക്റ്റ് ഓഫീസറായി സേവനമനുഷ്ഠിച്ചിട്ടുള്ള വ്യക്തിയാണ് നീൽ മോഹൻ. 2007-ൽ നീൽ മോഹൻ യൂട്യൂബിന്റെ ഉടമസ്ഥതയിലുള്ള ഗൂഗിളിൽ ചേർന്നു. ശേഷം ഡിസ്പ്ലേ ആൻഡ് വീഡിയോ ആഡ്സിന്റെ സീനിയർ വൈസ് പ്രസിഡന്റായി സ്ഥാനക്കയറ്റം നേടി. 2015ലാണ് യൂട്യൂബിന്റെ ചീഫ് പ്രൊഡക്റ്റ് ഓഫീസറായി നീൽ നിയമിതനായത്. യൂട്യൂബ് ഷോർട്ട്സ്, മ്യൂസിക്, സബ്സ്ക്രിപ്ഷൻ ഓഫറുകൾ എന്നിവ നിർമ്മിക്കുന്നതിളായിരുന്നു നീൽ ശ്രദ്ധ കേന്ദ്രീകരിച്ചിരുന്നത്.
