സ്വന്തം അമ്മയുടെ ചിരകാല സ്വപ്നം വര്‍ഷങ്ങള്‍ക്കിപ്പുറം നിറവേറ്റി ഒരു മകൻ. സ്‌കൂള്‍ കാലം തൊട്ട് അമ്മ പറയാറുള്ള ആഗ്രഹം സാധിച്ചുകൊടുത്തതിലെ സന്തോഷം ട്വിറ്ററിലൂടെ പങ്കുവച്ചുകൊണ്ടാണ് പൈലറ്റായ ആമിര്‍ റാഷിദ് വാനി ശ്രദ്ധ നേടുന്നത്. വലുതായാല്‍ തന്നെ മക്കയില്‍ കൊണ്ടുപോകണമെന്ന് അമ്മ ആമിറിനോട് പറഞ്ഞിരുന്നു. വര്‍ഷങ്ങള്‍ക്കിപ്പുറം ആ വാക്ക് ആമിർ പാലിച്ചു. അമ്മ മക്കയിലേക്ക് പറന്നത് മകന്‍ പൈലറ്റായ വിമാനത്തിന്റെ സുരക്ഷിതത്വത്തിലും.
അമ്മയുടേയും ആമിറിന്റെയും സ്വപ്ന സാക്ഷാത്കാരത്തിന്റെ കഥ ആമിർ തന്നെയാണ് ട്വിറ്ററില്‍ പങ്കുവച്ചത്. സ്‌കൂള്‍ കുട്ടി ആയിരിക്കുമ്പോള്‍ അമ്മ സ്വന്തം അഭിലാഷത്തെക്കുറിച്ച് ആമിറിനെഴുതിയ പഴയ കത്ത് കൂടി ഉള്‍പ്പെടുത്തിക്കൊണ്ടാണ് ട്വീറ്റ്. ഇന്ന്, മക്കയിലേക്ക് എത്തിക്കുന്ന യാത്രക്കാരുടെ കൂട്ടത്തില്‍ അമ്മയുമുണ്ടെന്ന് ആമിര്‍ ട്വീറ്റ് ചെയ്തു.
അതേസമയം ആമിറിന്റേയും അമ്മയുടേയും ജീവിത കഥ വളരെ ആവേശകരമാണെന്ന് നിരവധി ട്വിറ്റര്‍ ഉപയോക്താക്കള്‍ അഭിപ്രായപ്പെട്ടു. അടുത്ത കാലത്ത് കണ്ടതിൽ വച്ച് ഏറ്റവും ആനന്ദകരമായ ട്വീറ്റാണിതെന്നാണ് ചിലര്‍ കമന്റുകളിട്ടത്. എന്നാൽ ഈ നിമിഷത്തെയാണ് യഥാര്‍ഥത്തില്‍ ദൈവാനുഗ്രഹം എന്ന് വിളിക്കേണ്ടതെന്നായിരുന്നു മറ്റ് ചിലരും അഭിപ്രായപ്പെട്ടത്. കൂടാതെ നിരവധി പേർ ആമിറിന്റെ ട്വീറ്റ് റീട്വീറ്റ് ചെയ്യുകയും ചെയ്തു.
