വീടിന്റെ നാല് വശവും വളഞ്ഞാണ് യൂത്ത് കോണ്ഗ്രസ് സംസ്ഥാന അധ്യക്ഷന് രാഹുല് മാങ്കൂട്ടത്തിലിനെ അറസ്റ്റ് ചെയ്തതെന്ന് അമ്മ. രാഹുല് ഭീകരവാദിയാണെന്ന മട്ടിലാണ് പൊലീസ് പെരുമാറിയത്. വീട് വളഞ്ഞ് കൊണ്ടു പോകേണ്ട കുറ്റകൃത്യങ്ങളൊന്നും രാഹുല് ഇതുവരെ ചെയ്തിട്ടില്ല. പൊലീസിനെതിരെ എന്ത് നടപടി സ്വീകരിക്കണമെന്ന് രാഹുല് എത്തിയ ശേഷം തീരുമാനിക്കുമെന്നും അമ്മ പറഞ്ഞു.
സെക്രട്ടേറിയറ്റ് മാര്ച്ചുമായി ബന്ധപ്പെട്ടാണ് പൊലീസ് പുലര്ച്ചെ എത്തി രാഹുലിനെ അറസ്റ്റ് ചെയ്തത്.
‘രാവിലെ അഞ്ചരയ്ക്ക് ശേഷമാണ് പൊലീസ് എത്തിയത്. വീടിന്റെ നാല് വശത്തും ജനലിലും കതകിലുമൊക്കെ ഇവര് കൊട്ടുന്നുണ്ട്. റബ്ബര് വെട്ടുന്ന പയ്യനാണെന്നാണ് ആദ്യം വിചാരിച്ചത്. അവന് അങ്ങനെ ചെയ്യാറില്ല. ആറ് മണി കഴിഞ്ഞ കതക് തുറക്കുമ്പോള് ഒരു സംഘം പൊലീസുകാര് വീട്ടുമുറ്റത്തുണ്ട്. യൂണിഫോമിലും അല്ലാതെ വസ്ത്രം ധരിച്ചവരുമൊക്കെയുണ്ട്. കതക് തുറന്നപ്പോള് ഒരു വനിതാ പൊലീസ് ഉള്പ്പെടെയുള്ളവര് വീടിനകത്തേക്ക് കയറി രാഹുല് ഉണ്ടോ എന്ന് ചോദിച്ചു.
മുകളില് കയറി ചെന്ന് രാഹുലിന്റെ മുറിയുടെ വാതിലില് മുട്ടുകയായിരുന്നു. രാത്രി ഒരു മണിവരെ വായിച്ചൊക്കെ ഇരിക്കുകയായിരുന്നു. ഒന്പത് മണിക്ക് ശേഷമാണ് കൊല്ലത്തുനിന്ന് എത്തിയത്. രാഹുല് ഭീകരവാദിയാണെന്ന മട്ടിലായിരുന്നു പൊലീസിന്റെ പെരുമാറ്റം. വീട് വളഞ്ഞ് കൊണ്ടു പോകേണ്ട കുറ്റകൃത്യങ്ങള് ഒന്നും രാഹുല് ചെയ്തിട്ടില്ല. കന്റോണ്മെന്റ് പൊലീസിന്റെ തൊട്ടപ്പുറത്തുള്ള പൊലീസ് സ്റ്റേഷനിലാണ് ഒരാഴ്ച രാഹുല് കിടന്നത്. എന്തുകൊണ്ടാണ് അവിടെ വന്ന് എടുത്തുകൊണ്ട് പോകാഞ്ഞത്? ഇന്ന് പൊലീസ് കാണിച്ച രീതിക്ക് എന്ത് നടപടി വേണമെന്ന് രാഹുല് കൂടി വന്നിട്ട് തീരുമാനിക്കും,’ അമ്മ പറഞ്ഞു.
ആദ്യം പൊലീസിനെ കണ്ടപ്പോള് പതറിയെന്നും എന്നാല് പിന്നീട് ധൈര്യം സംഭരിച്ചുവെന്നും അമ്മ പറഞ്ഞു. ആരെയും കൊന്നതിനല്ലല്ലോ അറസ്റ്റ് എന്നും രാഹുല് മാങ്കൂട്ടത്തിലിന്റെ അമ്മ പറഞ്ഞു.
രാഹുലിനെ വൈദ്യ പരിശോധനയ്ക്ക് ശേഷം മജിസ്ട്രേറ്റിന് മുന്നില് ഹാജരാക്കി. അറസ്റ്റില് യൂത്ത് കോണ്ഗ്രസ് വ്യാപക പ്രതിഷേധത്തിന് ആഹ്വാനം ചെയ്തിട്ടുണ്ട്.