കോണ്ഗ്രസ് നേതാവ് രാഹുല് ഗാന്ധിക്കെതിരായ അപകീര്ത്തി കേസില് നടപടികള് റദ്ദാക്കിയ സുപ്രീം കോടതി വിധിയെ സ്വാഗതം ചെയ്യുന്നുവെന്ന് തമിഴ്നാട് മുഖ്യമന്ത്രി എം.കെ സ്റ്റാലിന്. നീതി നടപ്പിലാവുന്നുവെന്നും വയനാട് രാഹുല് നിലനിര്ത്തുന്നുവെന്നും സ്റ്റാലിന് ട്വീറ്റ് ചെയ്തു.
സുപ്രീം കോടതി വിധി ജുഡീഷ്യറിയിലുള്ള വിശ്വാസം വര്ധിപ്പിക്കുന്നുവെന്നും സ്റ്റാലിന് ട്വീറ്റ് ചെയ്തു.
‘നീതി നടപ്പിലാവുന്നു! വയനാട് രാഹുല് നിലനിര്ത്തുന്നു!
പ്രിയ സഹോദരന് രാഹുല് ഗാന്ധിക്കെതിരായ അപകീര്ത്തി കേസ് സ്റ്റേ ചെയ്തുകൊണ്ടുള്ള സുപ്രീം കോടതി വിധിയെ സ്വാഗതം ചെയ്യുന്നു. ജനാധിപത്യ മൂല്യങ്ങള് സംരക്ഷിക്കുന്നതിന്റെ പ്രധാന്യവും ജുഡീഷ്യറിയുടെ ശക്തിയിലുള്ള നമ്മുടെ വിശ്വാസത്തെയും ഒന്നുകൂടി ഉറപ്പിക്കുകയാണ് ഈ വിധി,’ സ്റ്റാലിന് ട്വീറ്റ് ചെയ്തു.
Justice prevails! #Wayanad retains #RahulGandhi!
Welcome the Hon’ble #SupremeCourt‘s decision staying the conviction of dear brother Thiru @RahulGandhi in the criminal defamation case. This decision reaffirms our belief in the strength of our judiciary and the importance of…
— M.K.Stalin (@mkstalin) August 4, 2023
അപകീര്ത്തികേസില് കോണ്ഗ്രസ് നേതാവ് രാഹുല് ഗാന്ധിക്കെതിരായ പരാമാവധി ശിക്ഷാ വിധിയായ രണ്ട് വര്ഷത്തെ തടവാണ് സുപ്രീം കോടതി സ്റ്റേ ചെയ്തത്. രാഹുല് ഗാന്ധിയെ എം.പി സ്ഥാനത്ത് നിന്ന് അയോഗ്യനാക്കിയ നടപടിയും സ്റ്റേ ചെയ്തു. ഇതോടെ രാഹുല് ഗാന്ധിക്ക് എം പിയായി തുടരാനാകും.
മോദി പരാമര്ശത്തില് സൂറത്ത് സെഷന്സ് കോടതിയുടെ വിധി ശരിവെച്ച ഗുജറാത്ത് ഹൈക്കോടതി വിധിക്കെതിരെയാണ് സുപ്രീം കോടതി വിധി പുറപ്പെടുവിച്ചിരിക്കുന്നത്. വിചാരണ കോടതി ഉത്തരവിനെ സുപ്രീം കോടതി വിമര്ശിക്കുകയും ചെയ്തു.
തനിക്കെതിരായ ശിക്ഷാവിധി ശരിവെച്ച ഗുജറാത്ത് ഹൈക്കോടതിയുടെ വിധി സ്റ്റേ ചെയ്യണമെന്ന് ആവശ്യപ്പെട്ടാണ് രാഹുല് ഗാന്ധി സുപ്രീം കോടതിയെ സമീപിച്ചത്. ഗുജറാത്തില് നിന്നുള്ള എം.എല്.എയായ പൂര്ണേഷ് മോദി നല്കിയ അപകീര്ത്തി കേസില് സൂറത്ത് സെഷന്സ് കോടതി രാഹുലിന് രണ്ട് വര്ഷത്തേക്ക് തടവ് ശിക്ഷ വിധിക്കുകയായിരുന്നു. ഈ വിധി വന്നതോടെ രാഹുലിനെ എം.പി സ്ഥാനത്തുനിന്ന് അയോഗ്യനാക്കുകയും ചെയ്തു. പിന്നാലെയാണ് രാഹുല് ഹൈക്കോടതിയെ സമീപിച്ചത്. ഹര്ജി പരിഗണിക്കാന് തയ്യാറാകാതെ ഹൈക്കോടതി തള്ളി. ഇതിന് പിന്നാലെയാണ് രാഹുല് സുപ്രീം കോടതിയെ സമീപിച്ചത്.
കീഴ്ക്കോടതിയുടെ വിധി സ്റ്റേ ചെയ്തില്ലെങ്കില് അത് സ്വതന്ത്രമായി അഭിപ്രായം പറയാനും സ്വതന്ത്രമായി ചിന്തിക്കാനും സ്വതന്ത്രമായി നിലപാടു പറയാനുമുള്ള അവകാശത്തെ ശ്വാസം മുട്ടിക്കുമെന്ന് ഹര്ജിയില് രാഹുല് ഗാന്ധി ചൂണ്ടിക്കാണിക്കുന്നു. 2019 ല് കര്ണാടകയിലെ കോലാറില് നടന്ന പ്രസംഗത്തിലെ മോദി പരാമര്ശത്തിനെതിരെയാണ് രാഹുലിനെതിരെ അപകീര്ത്തിക്കേസ് നല്കിയത്.