ശതകോടീശ്വരനും ഇ-കൊമേഴ്സ് ഭീമൻ ആമസോണിന്റെ സ്ഥാപകനുമായ ജെഫ് ബെസോസ് സമ്പത്തിന്റെ ഭൂരിഭാഗവും ഒഴിവാക്കാന് ആലോചിക്കുകയാണെന്ന് റിപ്പോർട്ട്. കാലാവസ്ഥാ വ്യതിയാനം, ചാരിറ്റി. രാഷ്ട്രീയ, സാമൂഹിക മുന്നേറ്റങ്ങള് എന്നീ കാര്യങ്ങൾക്ക് പ്രയോജനപ്പെടുത്തുന്നതിനായി സമ്പത്തിന്റെ വലിയൊരു ഭാഗം വിട്ടുനല്കുമെന്നാണ് ജെഫ് വെളിപ്പെടുത്തിയിരിക്കുന്നത്.
124.1 ബില്യണ് ഡോളര് അഥവാ പത്ത് ലക്ഷം കോടി രൂപയിലേറെയാണ് ജെഫിന്റെ ആസ്തി. ഫോര്ബ്സ് പട്ടിക പ്രകാരം ബെസോസ് ലോകത്തിലെ ഏറ്റവും സമ്പന്നനായ നാലാമത്തെ വ്യക്തിയാണ്. അതേസമയം നിരവധി തവണ ബെസോസ് അതിസമ്പന്നരുടെ പട്ടികയില് ഒന്നാമനുമായിട്ടുമുണ്ട്.
എന്നാൽ വളരെ ബുദ്ധിമുട്ടുള്ള തീരുമാനമാണ് ഇപ്പോഴെടുത്തിരിക്കുന്നതെന്നും ഭൂരിഭാഗം പണവും ഒഴിവാക്കാനുള്ള ഒരു തീരുമാനത്തിലേക്കെത്താന് ശ്രമിച്ചുവരികയാണെന്നും ജെഫ് ബെസോസ് വ്യക്തമാക്കി. 2021ലാണ് ആമസോണ് സിഇഒ സ്ഥാനം ബെസോസ് ഒഴിഞ്ഞത്. വാഷിംഗ്ടണ് പോസ്റ്റും എയ്റോസ്പേസ് കമ്പനിയായ ബ്ലൂ ഒറിജിനും ബെസോസിന്റേതാണ്.