പ്ലസ്ടു കഴിഞ്ഞവർക്ക് നേരിട്ട് ഐഐഎം പ്രവേശനത്തിന് വഴിയൊരുങ്ങുന്നു. ഇന്ത്യൻ ഇൻസ്റ്റിറ്റ്യൂട്ട് ഓഫ് മാനേജ്മെന്റ് ഇൻഡോർ ( ഐഐഎം) ആണ് വിദ്യാർത്ഥികൾക്ക് ഈ അവസരം ഒരുക്കുന്നത്. പ്ലസ്ടു കഴിഞ്ഞവർക്ക് അഞ്ച് വർഷത്തെ സംയോജിത മാനേജ്മെന്റ് പ്രോഗ്രാമിനാണ് അവസരം. കുറഞ്ഞ പ്രായത്തിൽത്തന്നെ മാനേജ്മെന്റ് കരിയറിലേക്ക് വിദ്യാർത്ഥികളെ ഉയർത്തുകയാണ് ലക്ഷ്യം.
ബിരുദധാരികൾക്കാണ് മാനേജ്മെന്റിലെ മികച്ച പ്രോഗ്രാമുകളിൽ സാധാരണയായി പ്രവേശനം ലഭിക്കുന്നത്. 2021, 22, 23 വർഷങ്ങളിലൊന്നിൽ പ്ലസ് ടു ജയിച്ചവർക്കാണ് ഇപ്പോൾ പ്രവേശനം. ജനനം 2003 ഓഗസ്റ്റ് ഒന്നിന് മുൻപാകരുത്. പട്ടിക വിഭാഗം ഭിന്ന ശേഷി വിഭാഗക്കാർക്ക് അഞ്ച് വർഷം വരെ ഇളവുണ്ട്. പ്രോഗ്രാമിന്റെ നാല്, അഞ്ച് വർഷങ്ങളിലെ സിലബസ് ഐ.ഐ.എമ്മിലെ റഗുലർ പിജിപിയുടേതായിരിക്കും
ഏപ്രിൽ 17 വരെ ഓൺലൈനായി അപേക്ഷിക്കാം. 4130 രൂപയാണ് അപേക്ഷ ഫീസ്.പട്ടിക-ഭിന്നശേഷി വിഭാഗക്കാർക്ക് 2065 രൂപയും. ജൂൺ 16 ന് നടക്കുന്ന അഭിരുചി പരീക്ഷയിൽ യോഗ്യത നേടുന്നവർക്കായിരിക്കും പ്രവേശനം