ഹുറൂൺ പുറത്തു വിട്ട ലോകത്തിലെ അതിസമ്പന്നരായ വ്യക്തികളുടെ പട്ടികയിൽ ഇടം നേടി റിലയൻസ് ഇൻഡസ്ട്രീസ് ലിമിറ്റഡ് ചെയർമാൻ മുകേഷ് അംബാനി. പട്ടികയിൽ ഇടം നേടിയ ഏക ഇന്ത്യക്കാരനാണ് അദ്ദേഹം. തുടർച്ചയായി മൂന്നാമത്തെ തവണയാണ് ഏഷ്യയിലെ ഏറ്റവും ധനികനായ വ്യക്തി എന്ന പദവി അംബാനി സ്വന്തമാക്കുന്നത്. കൂടാതെ ഈ പട്ടികയിലുള്ള ഏറ്റവും ധനികനായ ടെലികോം സംരംഭകൻ കൂടിയാണ് അദ്ദേഹം.
അതേസമയം ഹിൻഡർബെർഗ് റിപ്പോർട്ടിലൂടെ സാമ്പത്തിക രംഗത്ത് വൻ തിരിച്ചടി നേരിട്ടതിനാൽ ഗൗതം അദാനിക്ക് പട്ടികയുടെ ആദ്യ സ്ഥാനങ്ങളിൽ എത്താൻ സാധിച്ചില്ല. ഹിൻഡർബെർഗ് വിവാദങ്ങൾ പുറത്ത് വരുന്നതിന് മുൻപ് ലോകത്തിലെ ഏറ്റവും ധനികനായ രണ്ടാമത്തെ വ്യക്തി അദാനിയായിരുന്നു. എന്നാൽ ഹിൻഡർബെർഗ് റിപ്പോർട്ട് ഓഹരി വിപണികളിലുൾപ്പെടെ അദാനിയുടെ സാമ്പത്തിക സ്ഥിതിയെ അതിഭീകരമായി ബാധിച്ചു.
ഇപ്പോൾ ഓരോ ആഴ്ചയിലും 3000 കോടിയുടെ നഷ്ടമാണ് അദാനിക്ക് ഉണ്ടാകുന്നത് എന്നാണ് പുറത്ത് വരുന്ന കണക്കുകൾ. അതുകൊണ്ട് തന്നെ ഈ വർഷത്തെ റാങ്കിൽ അദ്ദേഹം പതിനൊന്നാം സ്ഥാനത്തേക്ക് പിന്തള്ളപ്പെട്ടു. ഹുറുൺ ഗ്ലോബലിന്റെ കണക്കുകൾ പ്രകാരം അതിസമ്പന്നരുടെ എണ്ണത്തിൽ അമേരിക്കയും ചൈനയും കഴിഞ്ഞാൽ മൂന്നാം സ്ഥാനമാണ് ഇന്ത്യയ്ക്ക്.
