സാധാരണ കുട്ടികളില് നിന്നും വ്യത്യസ്തരാണ് ഓട്ടിസം ബാധിച്ച കുട്ടികൾ. ഇവർക്ക് കൂടുതല് പരിഗണനയും സ്നേഹവും ആവശ്യമാണ്. അവരെ കൂടുതല് സന്തോഷിപ്പിക്കാനും ആക്ടീവ് ആക്കാനുമായി പല ശ്രമങ്ങളും മാതാപിതാക്കൾ നടത്താറുണ്ട്. അത്തരത്തിൽ ഓട്ടിസം ബാധിതനായ മകനെ സന്തോഷിപ്പിക്കാനായി ഒരു പിതാവ് വലിയ പിറന്നാള് ആഘോഷം ഒരുക്കി. കാനഡയിലെ വാന്കൂവര് സ്വദേശിയായ ഡേവിഡ് ഷെന് എന്ന പിതാവാണ് മകന് മാക്സിനായി പിറന്നാള് പാര്ട്ടി ഒരുക്കിയത്.
എന്നാല് ആ പാര്ട്ടി ഇരുവർക്കും കൂടുതല് സങ്കടമാണ് നൽകിയത്. ഇവർക്കുണ്ടായ ദുരനുഭവം അച്ഛന് ട്വിറ്ററില് പങ്കുവെയ്ക്കുകയും ചെയ്തിട്ടുണ്ട്. മാക്സിന്റെ ക്ലാസിലെ 19 കുട്ടികളേയും ഡേവിഡ് പാര്ട്ടിക്കായി ക്ഷണിച്ചിരുന്നു. എന്നാല് ഒരു കുട്ടി മാത്രമാണ് ആഘോഷത്തില് പങ്കെടുത്തത്. ഇത് വളരെയധികം വേദനയുണ്ടാക്കിയെന്നും ഡേവിഡ് ട്വിറ്ററിൽ കുറിച്ചു.
മകനേയും കൂട്ടുകാരേയും സന്തോഷിപ്പിക്കുന്നതിനായി വലിയൊരു ഇന്ഡോര് പ്ലേ ഗ്രൗണ്ടിലാണ് ഡേവിഡ് പാര്ട്ടി ഒരുക്കിയിരുന്നത്. അതേസമയം കൂട്ടുകാരെല്ലാവരും എത്തുമെന്ന് പ്രതീക്ഷിച്ച് മാക്സ് കാത്തിരുന്നു. എന്നാല് ഒരു കൂട്ടുകാരന് മാത്രം അവന്റെ അമ്മയോടൊപ്പം പാർട്ടിയ്ക്ക് വന്നു. ഒടുവില് മകന് ആ കൂട്ടുകാരനൊപ്പം ഒരു ചെറിയ കപ്പ് കേക്ക് മുറിച്ചാണ് പിറന്നാള് ആഘോഷിച്ചത്.