ദുബായ്: ഹോളിവുഡിനെ കടത്തി വെട്ടി ഗിന്നസ് വേൾഡ് റെക്കോർഡിൽ ഇടം പിടിച്ച് ദുബായ്. ലോകത്തിലേറ്റവും ഉയരം കൂടിയ ലാൻഡ്മാർക്ക് സൈൻ സ്താപിച്ചതിനാണ് റെക്കോർഡ്. ഹജർ മലനിരകൾക്ക് മുകളിൽ സ്ഥാപിച്ച ഹത്ത സൈൻ ബോർഡാണ് റെക്കോർഡ് നേടിയത്.
13.7 മീറ്റർ ഉയരമുള്ള ഹോളിവുഡിലെ സൈൻ ബോർഡിനായിരുന്നു ഇതുവരെ റെക്കോർഡ്. ഇതു മറികടന്ന് 19.28 മീറ്റർ ഉയരത്തിലാണ് ഹത്ത സൈൻ നിർമിച്ചിരിക്കുന്നത്. ഒമാൻ അതിർത്തിയോട് ചേർന്ന് സ്ഥിതി ചെയ്യുന്ന ഹത്ത സാഹസിക വിനോദസഞ്ചാരികളുടെ പ്രിയപ്പെട്ട ഇടമാണ്. ഹത്ത വാദി ഹബ്ബിൽ നിന്നും 30 മിനിറ്റ് കാൽനടയായി സഞ്ചരിച്ചാൽ ഹോൾഡിങ്ങിലേക്ക് എത്താം
ദുബായ് 2040 മാസ്റ്റർ പ്ലാനിൽ വരുന്ന പദ്ധതിയാണ് ഹത്ത മാസ്റ്റർ ഡവലപ്മെന്റ് പ്ലാൻ. മൗണ്ടൻ ബൈക്കിംഗിനും കയാക്കിങ്ങിനും ഏറെ പേരുകേട്ട സ്ഥലമാണ് ഹത്ത. രാത്രികാലങ്ങളിൽ ലൈറ്റിങ്ങോട് കൂടിയായിരിക്കും സൈൻ ദൃശ്യമാവുക. വളരെ ദൂരെ നിന്നും പോലും ദൃശ്യമാകുന്ന രീതിയിലാണ് ഹത്ത സൈൻ നിർമിച്ചിരിക്കുന്നത്