തൃശൂര്‍: ബിജെപി സംസ്ഥാന വൈസ് പ്രസിഡന്റ് ശോഭ സുരേന്ദ്രന്റെ വീടിന് മുന്നിലെ പൊട്ടിത്തെറിയിൽ ദുരൂഹതയില്ലെന്ന് പൊലീസ്. പൊട്ടിയത് പടക്കമാണെന്ന് പൊലീസ് അറിയിച്ചു.
പ്രദേശവാസികളായ മൂന്നു യുവാക്കളാണ് ശോഭാ സുരേന്ദ്രൻ്റെ വീടിന് മുമ്പിൽ പടക്കം പൊട്ടിച്ചതെന്ന് കണ്ടെത്തി. ഈസ്റ്ററിന് വാങ്ങിയ പടക്കമാണ് പൊട്ടിച്ചതെന്നാണ് യുവാക്കൾ പൊലീസിനോട് വിശദീകരിച്ചത്.
സ്വന്തം വീടിന് മുന്നിലാണ് സുഹൃത്തുക്കൾക്കൊപ്പം പടക്കം പൊട്ടിച്ചെന്നാണ് യുവാവിൻ്റെ മൊഴി. എന്നാൽ പൊട്ടിത്തെറി ശബ്ദം കേട്ട് പൊലീസ് വന്നതോടെ യുവാക്കൾ ഭയന്നു. ഇതോടെ ആരും ഒന്നും പുറത്തു പറഞ്ഞില്ല. അന്വേഷണത്തിൽ യുവാക്കളുടെ മൊഴി സത്യമാണെന്ന് കണ്ടതോടെ അലക്ഷ്യമായി പടക്കം പൊട്ടിച്ചതിന് മാത്രം കേസെടുത്ത് യുവാക്കളെ വിട്ടയക്കും.
