ജമ്മു കശ്മീർ മുൻ മുഖ്യമന്ത്രിയായിരുന്ന ഗുലാം നബി ആസാദ് പുതിയ പാർട്ടി പ്രഖ്യാപിച്ചു. ഡെമോക്രാറ്റിക് ആസാദ് പാർട്ടി എന്നാണ് പുതിയ പാർട്ടിയുടെ പേര്. ഒരു മാസം മുൻപാണ് അദ്ദേഹം കോൺഗ്രസിൽ നിന്നും രാജി വച്ചത്. ജനാധിപത്യപരവും എല്ലാ തരം സ്വാധീനങ്ങളിൽ നിന്ന് സ്വാതന്ത്രപരവുമായിരിക്കും പുതിയ പാർട്ടിയെന്ന് അദ്ദേഹം വാർത്താസമ്മേളനത്തിൽ പറഞ്ഞു. മഞ്ഞ, വെള്ള, നീല നിറങ്ങൾ ഉൾപ്പെടുന്നതാണ് ഡെമോക്രാറ്റിക് ആസാദ് പാർട്ടിയുടെ പതാക.
ജമ്മു കശ്മീരിലെ ജനങ്ങൾ ആയിരിക്കും പുതിയ പാർട്ടിയുടെ പേരും പതാകയും തീരുമാനിക്കുക എന്ന് അദ്ദേഹം നേരത്തേ പ്രഖ്യാപിച്ചിരുന്നു. എല്ലാവർക്കും മനസിലാവുന്ന തരത്തിലുള്ള ഹിന്ദുസ്ഥാനി പേരായിരിക്കും നൽകുക എന്നും ജനങ്ങൾക്ക് ഉറപ്പ് നൽകി. ജമ്മു കാശ്മീരിലായിരിക്കും പുതിയ പാർട്ടിയുടെ ആദ്യ യൂണിറ്റ് തുടങ്ങുക. അതേസമയം കാശ്മീരിന് പൂർണ്ണ സംസ്ഥാന പദവി ലഭിക്കുന്നതിനാവശ്യമായ പ്രവർത്തനങ്ങൾക്ക് നേതൃത്വം നൽകുമെന്ന് ഗുലാം നബി ആസാദ് വ്യക്തമാക്കി.